गोवेलीत इमारतीवरून पडून नर्सचा मृत्यू
टिटवाळा, ता. २४ (वार्ताहर) : कल्याण तालुक्यातील गोवेली येथील ग्रामीण रुग्णालय परिसरात एका परिचारिकेचा (नर्स) इमारतीच्या गच्चीवरून पडून मृत्यू झाल्याची घटना समोर आली आहे. कामिनी गायकवाड असे या मृत परिचारिकेचे नाव असून, त्या राहत असलेल्या इमारतीच्या टेरेसवरून पडल्याने हा अपघात घडल्याचे प्राथमिक माहितीतून समोर येत आहे. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, कामिनी गायकवाड या मूळच्या नाशिक जिल्ह्यातील असून, गेल्या काही काळापासून गोवेली परिसरातच वास्तव्यास होत्या. रविवारी (ता. २१) दुपारच्या सुमारास त्या इमारतीच्या टेरेसवर झाडांना पाणी घालण्यासाठी गेल्या होत्या. या वेळी त्यांचा पाय घसरल्याने किंवा अन्य कारणाने तोल जाऊन त्या खाली कोसळल्या असाव्यात, असा अहवाल प्रथमदर्शनी सादर करण्यात आला आहे. सायंकाळच्या सुमारास परिसरात काम करणाऱ्या मजुरांना त्यांचा मृतदेह दिसून आला. त्यानंतर तत्काळ पोलिसांना पाचारण करण्यात आले. घटनेची माहिती मिळताच पोलिसांनी घटनास्थळी धाव घेऊन पंचनामा केला. मृतदेह उत्तरीय तपासणीसाठी (पीएम) पाठवण्यात आला आहे. पोलिसांनी याप्रकरणी अकस्मात मृत्यूची नोंद केली असून अधिक तपास सुरू आहे.

मानसिक तणाव
कामिनी गायकवाड यांनी कोरोनाच्या कठीण काळात गोवेली ग्रामीण रुग्णालयात फ्रंटलाइन वर्कर म्हणून अत्यंत मोलाची सेवा बजावली होती. कोरोना काळ संपल्यानंतर त्यांची बदली ठाणे सिव्हिल हॉस्पिटल येथे झाली होती. मात्र, गेल्या दिवसांपासून रजेवर होत्या. त्यांना एक मुलगा आणि एक मुलगी आहे. गेल्या काही दिवसांपासून त्या काहीशा मानसिक तणावाखाली होत्या, असेही त्यांच्या निकटवर्तीयांकडून सांगण्यात येत आहे.