आझाद मैदानात ख्रिसमसचे आयोजन; नोवेल साळवे यांच्याकडून देशवासीयांना शुभेच्छा
मुंबई, ता. २८ (प्रतिनिधी) : राष्ट्रवादी काँग्रेस पार्टी (शरदचंद्र पवार) पक्षाचे माजी प्रदेश सचिव तसेच दि इंडियन ख्रिश्चन असोसिएशनचे संस्थापक नोवेल साळवे यांनी नाताळ (ख्रिसमस)च्या पूर्वसंध्येला देशवासीयांना तसेच सर्व ख्रिस्तीबांधवांना ख्रिसमसच्या शुभेच्छा दिल्या.
मुंबईतील आझाद मैदानात गेल्या १३ दिवसांपासून न्यायाच्या मागणीसाठी सुरू असलेल्या धरणे आंदोलनाच्या पार्श्वभूमीवर, आंदोलन सुरू असतानाच साळवे यांनी नाताळच्या पूर्वसंध्येला हा संदेश दिला. प्रभू येशू ख्रिस्ताचा जन्मदिन साजरा करताना त्यांच्या शिकवणीचे स्मरण ठेवणे अत्यंत आवश्यक असल्याचे त्यांनी सांगितले. ख्रिश्चन धर्म आणि पवित्र बायबलचा मूलमंत्र प्रेम, आपुलकी आणि शांती यांवर आधारित असल्याचे नमूद करत, या मूल्यांपासून दूर गेल्यास स्वतःला ख्रिस्ती म्हणवून घेणे योग्य ठरणार नाही, असा संदेश साळवे यांनी समाजबांधवांना दिला. ख्रिस्ती समाजातील पूर्वजांनी केलेल्या त्यागामुळे आणि समाजोपयोगी कार्यामुळे आज समाजाचे अस्तित्व टिकून आहे, असे सांगत सध्याच्या पिढीनेही अशाच प्रकारचे चांगले कार्य करणे गरजेचे आहे. तरच भविष्यात ख्रिस्ती समाजाचे अस्तित्व भक्कम राहील, अशी अपेक्षा नोवेल साळवे यांनी या वेळी व्यक्त केली.