कुकरी सापाचे पालीत दर्शन
विक्रमगड, ता.२४ (बातमीदार)ः तालुक्यातील पाली येथील नकुल पाटकर यांच्या दुकानात दुर्मिळ कुकरी सापाचे दर्शन झाले. या सापाला सर्पमित्रांनी नैसर्गिक अधिवासात सोडून दिले आहे.
कुकरी हा बिनविषारी साप लहान असून त्यांची लांबी ३०- ६० सेंमी.असते. इतर सापांच्या मानाने यांना थोडे दात असतात. वरच्या जबड्यातील मागचे काही दात गुरख्यांच्या कुकरीच्या आकाराचे असल्यामुळे यांना ‘कुकरी’ साप म्हणतात. भित्रा, चपळ लाजाळू असतात. सरडे, पाली यांच्या अंडीवर उदरनिर्वाह करतात. शरीर तपकिरी असून त्यावर २०-६० काळे आडवे पट्टे असतात. हा साप सगळे शरीर खूप फुगवतो. गवतावरील किडे, आळ्या, नाकतोडे, छोटे बेडूक त्याचे खाद्य आहे. मात्र, ग्रामीण भागात हा साप विषारी असल्याचा समज असल्याने अनेक वेळा मारले जाते. त्यामुळे ग्रामीण भागात कुकरी सापाची संख्या कमी होत असल्याचे सर्पमित्र पप्पु दिघे यांनी सांगितले.