उमेदवारांच्या खर्चावर ‘वॉच’ ठेवण्यासाठी प्रशिक्षण
लेखा अधिकाऱ्यांचे मार्गदर्शन; सहा पथके सहभागी

उल्हासनगर, ता. २८ (बातमीदार) : आगामी महापालिका निवडणुकीच्या पार्श्वभूमीवर निवडणूक खर्चावर नियंत्रण मिळवण्यासाठी महापालिका प्रशासनाने कंबर कसली आहे. १५ जानेवारीला होणाऱ्या मतदानासाठी उमेदवारांच्या खर्चावर बारीक लक्ष ठेवण्यासाठी नेमण्यात आलेल्या सहा पथकांना नुकतेच विशेष प्रशिक्षण देण्यात आले.

लेखा अधिकाऱ्यांचे मार्गदर्शन राज्य निवडणूक आयोगाच्या सूचनांनुसार आणि आयुक्त मनीषा आव्हाळे यांच्या निर्देशानुसार शुक्रवारी (ता. २६) जनरल अरुणकुमार वैद्य टाऊन हॉल येथे हे प्रशिक्षण पार पडले. मुख्य लेखा अधिकारी तथा नोडल अधिकारी किरण भिलारे यांनी पथकांना येणाऱ्या अडचणींवर मिश्कील शैलीत उपाय सुचवले, तर मुख्य लेखा परीक्षक अभिजित पिसाळ यांनी निवडणूक आयोगाच्या तांत्रिक तरतुदींची माहिती दिली. प्रशिक्षणात खर्चविषयक टीम, भरारी पथके, स्थिर सर्वेक्षण चमू, व्हिडिओ सर्वेक्षण चमू, व्हिडिओ पाहणारे चमू, पोलिस कर्मचारी सहभागी झाले होते. या प्रशिक्षण कार्यक्रमाला उपायुक्त स्नेहा करपे, उपायुक्त दीपाली चौगले, खर्च पथकप्रमुख विलास नागदिवे, संजय वायदंडे, विजय कोरडे, अविनाश विशे आणि भांडार विभागप्रमुख अंकुश कदम उपस्थित होते.

उमेदवारांसाठी नऊ लाखांची मर्यादा
निवडणुकीत प्रत्येक उमेदवाराला नऊ लाख रुपयांपर्यंत खर्च करण्याची मर्यादा आहे. ३० डिसेंबरपर्यंत अर्ज सादर करण्याची मुदत असून, २ जानेवारी ही अर्ज मागे घेण्याची शेवटची तारीख आहे. रिंगणात राहणाऱ्या प्रत्येक उमेदवाराला आपला दैनंदिन खर्च सादर करणे बंधनकारक असेल, अशी माहिती प्रशासनातर्फे देण्यात आली.