मराठीच्या मुद्द्यावर मारहाण नको
जैन मुनी नीलेशचंद्र महाराज यांचे प्रतिपादन

भाईंदर, ता. २७ (बातमीदार) ः काही महिन्यांपूर्वी मराठी न बोलण्याच्या मुद्द्यावर मिरा रोड येथे एक व्यापाऱ्याला मनसेच्या कार्यकर्त्यांनी मारहाण केली होती. आता हा मुद्दा पुन्हा एकदा चर्चेत आला आहे. मिरा रोड येथे आयोजित एका धार्मिक कार्यक्रमात जैन मुनी नीलेशचंद्र महाराज यांनी या प्रकाराबद्दल खंत व्यक्त करून असे प्रकार टाळायला हवेत, असे सांगितले.
आम्ही मराठीचा आणि महाराष्ट्राचा आदर करतो; परंतु यापुढे एखाद्या मारवाडीबांधवाला हात लावला तर जशास तसे उत्तर दिले जाईल, असा इशाराही जैन मुनी नीलेशचंद्र महाराज यांनी या वेळी दिला. हटकेश परिसरात सनातन धर्मसभा प्रवचन कार्यक्रमाचे आयोजन करण्यात आले आहे. शिवसेना शिंदे गटाकडून सामाजिक संस्थेच्या माध्यमातून हा कार्यक्रम आयोजित करण्यात आला आहे. या कार्यक्रमाला शनिवारी (ता. २७) नीलेशचंद्र महाराज उपस्थित होते. ते पुढे म्हणाले, की राजस्थानी समाजाने संघटित होण्याची गरज आहे. काही नेत्यांना निवडणूक येते तेव्हाच हिंदुत्व आठवते. शहरात दोन समाजांत वाद झाला तेव्हा त्यांचे हिंदुत्व कुठे गेले होते, असा सवाल त्यांनी कोणाचेही नाव न घेता केला. बाळासाहेब ठाकरे आणि आनंद दिघे हे दोनच हिंदुत्ववादी नेते होते. बाळासाहेबांच्या वारसदारांना जे जमले नाही ते हिंदुत्ववादी विचारधारा असलेल्या एकनाथ शिंदेंनी गाईला गोमातेचा दर्जा देऊन करून दाखवले, असे कौतुकोद्गार त्यांनी या वेळी काढले.