२३ जणांविरोधात गुन्हा
भिवंडीत काँग्रेस-भाजप हाणामारी प्रकरण
भिवंडी, ता. ४ (वार्ताहर) ः महापालिका निवडणुकीच्या प्रचारादरम्यान शनिवारी (ता. ३) भंडारी चौक नारपोलीत काँग्रेस व भाजप पदाधिकारी कार्यकर्त्यांमध्ये झालेल्या हाणामारीप्रकरणी दोन वेगवेगळ्या पोलिस ठाण्यांत २३ जणांविरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, भाजप उमेदवार यशवंत टावरे यांनी नारपोली पोलिस ठाण्यात दिलेल्या तक्रारीवरून काँग्रेस उमेदवार जितेंद्र पाल, राज यादव, धर्मेंद्र पाल, राहुल पाल, अश्विनी वर्मा ऊर्फ मल्लू, गोपी वर्मा, लक्की जयस्वाल, नूर अली चायनीजवाला, लखन राठोड, रोहित यादव ऊर्फ लेंडी, विकी वर्मा, यश पाटील व इतर ३० ते ३५ अनोळखी व्यक्तींविरोधात रात्री उशिरा गुन्हा दाखल करण्यात आला. तर काँग्रेस उमेदवार जितेंद्र पाल यांनी भोईवाडा पोलिस ठाण्यात दिलेल्या तक्रारीनंतर यशवंत टावरे, रूपम टावरे, योगेश टावरे, रितेश टावरे, भरत टावरे, किरण माने, राजा इंदुरकर, विक्की बिल्लारे, राहुल जाधव, जसवंत गुप्ता, नितेश जाधव व इतर चार ते पाच अनोळखी व्यक्ती यांच्याविरोधात गुन्हा नोंदवण्यात आला आहे.

रॅली विनापरवाना
विशेष म्हणजे, काँग्रेस उमेदवारांनी काढलेली प्रचार रॅली ही विनापरवाना होती. तर काँग्रेस उमेदवाराचे कार्यालयसुद्धा विनापरवाना सुरू केले होते. याबाबत निवडणूक निर्णय अधिकारी पाच यांच्या मार्गदर्शनाखाली भरारी पथकातील कर्मचारी संदीप चव्हाण यांनी भोईवाडा पोलिस ठाण्यात आचारसंहिता उल्लंघन केल्याप्रकरणी काँग्रेस उमेदवार जितेंद्र पाल यांच्याविरोधात गुन्हा नोंदवला आहे.