कल्याण तालुक्यात पोलिसांचा रूटमार्च
टिटवाळा, ता. १२ (वार्ताहर) : कल्याण-डोंबिवली महानगरपालिका निवडणुकीच्या पार्श्वभूमीवर कोणताही अनुचित प्रकार घडू नये, आणि प्रक्रिया शांततेत पार पडावी, यासाठी पोलिसांकडून उपाययोजना राबवण्यात येत आहेत. त्याच अनुषंगाने कल्याण तालुका पोलिस स्टेशनच्या हद्दीतील संवेदनशील भागांमध्ये रूटमार्च काढण्यात आला.
मांडा गाव, टिटवाळा गणेश मंदिर रोड, इंदिरा नगर, गाळेगाव, तरे मार्केट परिसर आणि बनेली डोंगरवाली मातादी परिसरात पोलिसांनी शिस्तबद्ध रूटमार्च काढला. या भागांमध्ये मोठ्या प्रमाणावर पोलिसांचा फौजफाटा तैनात करण्यात आल्याने परिसरात कायदा-सुव्यवस्थेचा संदेश देण्यात आला.
या मार्चमध्ये वरिष्ठ पोलिस अधिकारी, पोलिस अंमलदार आणि आरसीपी प्लाटून सहभागी झाले होते. या मार्चमुळे नागरिकांमध्ये सुरक्षिततेची भावना अधिक बळकट झाली आहे. निवडणूक काळात कायदा मोडणाऱ्यांवर कठोर कारवाई केली जाईल, कोणतीही तडजोड केली जाणार नाही, असा इशाराही पोलिस प्रशासनाने दिला आहे.