‘एल्फिन्स्टन’बाधितांना आठवडाभरात घरे
एमएमआरडीए म्हाडाकडून ७८ घरांचा ताबा घेणार
सकाळ वृत्तसेवा
मुंबई, ता. १३ : वरळी-शिवडी कनेक्टरसाठी प्रभादेवी येथे एल्फिन्स्टन पूल पाडून दुमजली पूल उभारला जात आहे. त्यामुळे बाधित रहिवाशांसाठी एमएमआरडीए म्हाडाकडून आठवडाभरात घरांचा ताबा मिळणार आहे. एमएमआरडीएने ७८ घरांच्या किंमतीपोटी म्हाडाला ८९ कोटी रूपये चुकते केले आहेत. त्यामुळे घरांचा ताबा घेण्याची प्रक्रिया सुरू असून ती पूर्ण झाल्यानंतर तातडीने रहिवाशांना घरांचा ताबा दिला जाणार आहे.
एल्फिन्स्टन पूलाच्या कामामुळे हाजी नुरानी आणि लक्ष्मी निवास या दोन इमारती बाधित होणार आहेत. ‘लक्ष्मी निवास’मध्ये ६०, तर ‘हाजी नुरानी’मध्ये २३ रहिवाशी आहेत. संबंधित रहिवाशांना दादर, प्रभादेवी, वडाळा, लोअर परळ या भागातील म्हाडाची ८३ घरे मालकी तत्वावर दिली जाणार होती; मात्र पाच रहिवाशांची इतरत्र व्यवस्था झाल्याने एमएमआरडीए आता म्हाडाची ७८ घरे घेणार आहे. म्हाडाच्या मुंबई इमारत दुरूस्ती व पुनर्रचना मंडळाच्या मालकीची असलेली ही घरे रेडिरेकनर दराच्या ११० टक्के किंमतीला दिली जाणार आहेत. त्यापोटी एमएमआरडीएने ८९.३९ कोटी म्हाडाला वळते केले आहेत. त्यामुळे लवकरच एमएमआरडीएकडे घरे हस्तांतरित केली जाणार असून संबंधित रहिवाशांना दिली जाणार असल्याचे एमएमआरडीएच्या एका वरिष्ठ अधिकाऱ्याने सांगितले.