उमेदवाराच्या पायाला भिंगरी
प्रचाराच्या शेवटच्या दिवशी शक्तिप्रदर्शन
भाईंदर, ता.१३ (बातमीदार)ः मिरा भाईंदर महापालिकेच्या निवडणुकीसाठीचा प्रचार मंगळवारी (ता.१३) सायंकाळी थांबला. प्रचाराच्या शेवटच्या तासात उमेदवार अक्षरशः पायाला भिंगरी लावल्या प्रमाणे प्रभाग पिंजून काढत होते.
सायंकाळी ५ वाजता प्रचार बंद होणार असल्याने सर्वच पक्षांनी आपले सर्वस्व पणाला लावले. शिवसेनेकडून संपूर्ण शहरभर बाईक रॅली काढून वातावरण निर्माण करायचा प्रयत्न केला. परिवहनमंत्री प्रताप सरनाईक यात सहभागी झाले होते. शिवसेनेचे आमदार निलेश राणे यांनी देखील भाईंदर पूर्व भागातील काही प्रभागात सभा घेतल्या. आमदार नरेंद्र मेहता यांनी देखील अनेक प्रभाग पिंजून काढत उमेदवारांचा प्रचार केला. विविध समाजाच्या लोकांसोबत भेटी गाठी घेतल्या. काँग्रेसचे नेते मुझफ्फर हुसेन, शिवसेना ठाकरे गट, राष्ट्रवादी काँग्रेस, मनसे आदी पक्षांच्या उमेदवारांनीही घरोघरी जात प्रचाराची शेवटची फेरी पूर्ण केली.