धोक्याच्या वळणावर जीवघेणा खड्डा
जव्हार-नाशिक महामार्गावर अपघातांचे सत्र
जव्हार, ता. १४ (बातमीदार) ः जव्हार-नाशिक महामार्गावर बोरीचा वाकाणजवळ असलेले धोक्याचे वळण जीवावर बेतत आहे. कारण या रस्त्यावर असलेला मोठा खड्डा दुचाकीस्वारांसाठी अपघाताला निमित्त ठरत आहे.
जव्हार-नाशिक राज्यमार्ग असल्याने मोठ्या प्रमाणात रहदारी असते. येथील नागरिकांना बाजार, दवाखाना यासाठी नाशिकला जावे लागत असल्याने मोठ्या प्रमाणात वाहनांची वर्दळ असते. असे असताना या रस्त्यावर पडलेला खड्डा अपघातांना निमित्त ठरत आहे. काही दिवसांपूर्वी येथे झालेल्या अपघातात दुचाकीस्वाराबरोबर त्याची गरोदर पत्नी खड्ड्यात पडली होती. या अपघातात महिलेचा हात मोडल्याची माहिती प्रत्यक्षदर्शीने दिली आहे. त्यामुळे प्रशासनाची निष्काळजी कोणाच्याही जीवावर बेतण्याचा धोका आहे.