खारघर, ता. २० (बातमीदार) : खारघर वसाहतीत रविवारी (ता. २०) रात्री अवघ्या दहा मिनिटांच्या अंतरात दुचाकीवरून आलेल्या चोरट्यांनी पायी चालणाऱ्या दोन महिलांच्या गळ्यातील मंगळसूत्र हिसकावून पळ काढण्याच्या घटनेमुळे महिला वर्गात भीतीचे वातावरण पसरले आहे. खारघर सेक्टर १५ मधील पारिजात सोसायटीच्या गेटसमोरील रस्त्यावर ६३ वर्षीय महिला शतपावलीसाठी रस्त्याने जात असताना दुचाकीवरून आलेल्या दोन व्यक्तींनी त्यांच्या गळ्यातील मंगळसूत्र हिसकावून पळ काढला. या घटनेनंतर अवघ्या दहा मिनिटांत, सेक्टर १९ येथील रामशेठ ठाकूर शाळेजवळील रस्त्यावर कॅनरा बँक शाखेसमोरून जाणाऱ्या दुसऱ्या महिलेच्या गळ्यातील मंगळसूत्र अशाच पद्धतीने हिसकावण्यात आले. या दोन्ही घटनांची नोंद पोलिस ठाण्यात करण्यात आली आहे.