मुलुंड पूर्वेतील गतिरोधक रंगविण्याची मागणी
मुलुंड, ता. २० (बातमीदार) : मुलुंड पूर्वेतील बाळ धारप उड्डाणपुलापासून गव्हाणपाडा जंक्शनच्या पुढे तसेच मच्छी मार्केटसमोरील गतिरोधकावरील पांढरा रंग पूर्णपणे उडाल्याने वाहनचालकांना गतिरोधक लक्षात येत नाही. या मार्गावर दुचाकीस्वार वेगाने वाहने चालवत असल्याने फिकट पडलेल्या रंगामुळे अनेक वेळा छोटे-मोठे अपघात घडत आहेत. विशेषतः रात्रीच्या वेळी आणि पावसाळ्यात या ठिकाणी अपघाताचा धोका अधिक वाढतो. त्यामुळे संबंधित प्रशासनाने तातडीने या ठिकाणचे गतिरोधक पुन्हा ठळक पांढऱ्या रंगाने रंगवावेत, अशी मागणी स्थानिक नागरिकांकडून करण्यात येत आहे. योग्य रंगकाम झाल्यास वाहनचालकांना गतिरोधक लवकर लक्षात येऊन संभाव्य अपघात टाळता येतील, असे नागरिकांचे म्हणणे आहे.