स्वीपअंतर्गत मतदार जनजागृती मोहीम
अलिबाग, ता. २१ (वार्ताहर) : जिल्हा परिषद व पंचायत समिती सार्वत्रिक निवडणूक २०२६ च्या पार्श्वभूमीवर स्वीपअंतर्गत म्हसळा तालुक्यातील मेंदडीकोंड आदिवासीवाडीत मतदार जनजागृती कार्यक्रम आयोजित करण्यात आला. राजिप मेंदडीकोंड शाळेच्या विद्यार्थ्यांनी फेरी काढून ग्रामस्थांमध्ये मतदानाबाबत जागृती केली. ‘माझे मत माझा हक्क’, ‘प्रत्येक मत अमूल्य’, ‘लोकशाही मजबूत करा, मतदान करा’ अशा घोषणांनी परिसर दुमदुमला.
कार्यक्रमासाठी पंचायत समिती म्हसळाचे गटशिक्षणाधिकारी साबळे, वरिष्ठ विस्तार अधिकारी अरविंद मोरे, झोनल ऑफिसर आनंद घरत तसेच स्वीप समितीचे अधिकारी उपस्थित होते. मार्गदर्शकांनी मतदार नोंदणी प्रक्रिया, मतदानाचा अधिकार, तसेच ईव्हीएम व व्हिव्हिपॅटची माहिती दिली. निर्भय व नैतिक मतदानाचे महत्त्व सांगत नागरिकांना आगामी निवडणुकीत सहभागाचे आवाहन करण्यात आले. ग्रामस्थांनी कार्यक्रमाला उत्स्फूर्त प्रतिसाद देत शंभर टक्के मतदानाचा संकल्प व्यक्त केला.