शिवरायांच्या अपरिचित स्फूर्तिकथांचे अभिवाचन
२३ जानेवारीला माटुंग्यात ‘शेर शिवराज है’ कार्यक्रम

मुंबई, ता. २१ : युनेस्कोने जागतिक वारसास्थळांच्या यादीत महाराष्ट्रातल्या ११ किल्ल्यांचा समावेश केला आहे. यामध्ये रायगड, राजगड, शिवनेरी, प्रतापगड, पन्हाळा, लोहगड, साल्हेर, सिंधुदुर्ग, विजयदुर्ग, सुवर्णदुर्ग, खांदेरी या किल्ल्यांचा समावेश आहे.
ही मान्यता मिळाल्यामुळे प्रेरित होऊन शिवप्रेमी आणि दुर्गअभ्यासक संदीप विचारे यांनी ‘शेर शिवराज है’ या मराठी अभिवाचन कार्यक्रमाची निर्मिती केली आहे. श्री शिवप्रताप प्रतिष्ठान आणि उर्विजा थिएटरतर्फे सादर होणाऱ्या या कार्यक्रमात, शिवाजी महाराजांच्या कार्यकर्तृत्वाविषयी फारशा परिचित नसलेल्या पण ऐतिहासिक आधार असलेल्या कथा लोकांसमोर येणार आहेत.
शुक्रवारी (ता. २३) सायंकाळी ६.३० वाजता माटुंगा येथील यशवंतराव चव्हाण नाट्यगृहातील साळगावकर प्रायोगिक रंगमंचावर होणारा हा कार्यक्रम प्रेक्षकांसाठी विनामूल्य आहे. या अभिवाचन कार्यक्रमात अभिजित धोत्रे, अजय धुमाळ, दिग्विजय चव्हाण, प्रसाद वैद्य, कालिका विचारे, विनायक बागवे, प्रदीप जोशी आणि प्रकाश निमकर हे सहभागी होणार आहेत. संकलन, दिग्दर्शन संदीप विचारे यांचे आहे. याआधीही संदीप विचारे यांनी व्यावसायिक नाटके केली असून छत्रपती शिवाजी महाराजांच्या आरमारी सामर्थ्याचे दर्शन घडवणाऱ्या ‘दर्या भवानी’ या नाटकाला अनेक पुरस्कार प्राप्त झाले आहेत.