कचोरेतील शाळेसमोर गतिरोधक बसवा
कल्याण, ता. २ (बातमीदार) : पत्रीपूल कचोरे येथील शाळेसमोरील रस्त्यावर गतिरोधक बसविण्यासाठी कल्याण-डोंबिवली महापालिकेला स्थानिकांच्या वतीने निवेदन देण्यात आले आहे. या मार्गावरून सतत वेगाने धावणाऱ्या वाहनांमुळे शालेय विद्यार्थी, ज्येष्ठ नागरिक आणि सामान्य नागरिकांच्या सुरक्षेला धोका निर्माण झाला आहे. त्यामुळे ठरावीक अंतरावर दोन गतिरोधक बसविण्यात यावेत, अशी मागणी जोर धरू लागली आहे.
पत्रीपूल कचोरे परिसरात सर्वोदय हिंदी विद्यालयाच्या दोन शाळा आहेत. या दोन्ही शाळांत हजारो विद्यार्थी शिक्षण घेतात. शाळेसमोरील रस्त्यावर गतिरोधक नसल्याने वाहने येथून भरधाव वेगात चालवली जातात. यामुळे रस्ता ओलांडताना विद्यार्थ्यांना सतर्कता बाळगावी लागते. विद्यार्थ्यांच्या सुरक्षेचा गंभीर प्रश्न कायम असल्याने पालक व शिक्षकांना अपघात होण्याची भीती सतावत आहे. हीच भीती ज्येष्ठ नागरिकांनाही रस्ता ओलांडताना असते. याच दृष्टीने ठरावीक अंतरावर दोन गतिरोधक बसविण्याची मागणी स्थानिकांच्या वतीने करण्यात आली आहे. महापालिकेच्या संबंधित अधिकाऱ्यांनी निवेदनाची दखल घेत एका आठवड्यात गतिरोधक बसविण्याचे आश्वासन दिले असल्याची माहिती निवेदनकर्त्यांकडून देण्यात आली आहे.