पनवेल, ता. २ (बातमीदार) : सर्वसामान्य जनतेच्या तक्रारी व समस्या तत्परतेने सोडविण्यासाठी पनवेल महापालिकेच्या मुख्यालयातील बैठक कक्षामध्ये सोमवारी (ता. २) लोकशाही दिनाचे आयोजन करण्यात आले. या बैठकीत नागरी सेवा सुविधा विभाग व इतर विभागाचे पाच अर्ज दाखल झाले होते. या अर्जाची दखल घेऊन नागरिकांच्या समस्या तातडीने सोडविण्यात आल्या. आयुक्त मंगेश चितळे यांच्या मार्गदर्शनाखाली या कार्यक्रमाला परिवहन विभाग व्यवस्थापक कैलास गावडे, उपायुक्त स्वरूप खारगे, उपायुक्त मंगला माळवे, सहाय्यक आयुक्त डॉ. रूपाली माने, कार्यकारी अभियंता सुधीर सांळुखे, प्रभाग अधिकारी, सामान्य प्रशासन विभागाचे अधिकारी व कर्मचारी उपस्थित होते.

नागरिकांच्या तक्रारी, अडचणी सोडविण्यासाठी प्रशासन आणि नागरिकांमध्ये संवादवाढीसाठी महापालिकास्तरावर प्रत्येक महिन्याच्या पहिल्या सोमवारी लोकशाही दिनाचे आयोजन करण्यात येत आहे. नागरिकांनी आपले वैयक्तिक अर्ज समन्वय अधिकाऱ्यांकडे पंधरा दिवस आधी द्यावेत. संबंधित नागरिकांनी लोकशाही दिनादिवशी उपस्थित राहावे, असे पालिकेच्या वतीने आवाहन करण्यात आले आहे.