वाशी, ता. ३ (बातमीदार) : नवी मुंबई महापालिकेच्या अतिक्रमण हटाव विभागाच्या वतीने ऐरोलीमध्ये अनधिकृत बांधकाम करण्यात येत हाेते. या बांधकामांवर अतिरिक्त आयुक्त डॉ. राहुल गेठे व उपआयुक्त (अतिक्रमण हटाव विभाग) डॉ. कैलास गायकवाड यांच्या मार्गदर्शनाखाली निष्कासनाची कारवाई करण्यात आली.

नवी मुंबई महापालिका कार्यक्षेत्रातील जी विभाग ऐरोली कार्यालय अंतर्गत ऐरोली सेक्टर २ येथे बबन बाबू पवार, गुफरान खान (ठेकेदार), ओमकार निर्गुडे (वास्तुविशारद) यांनी, तसेच प्रेमानंद प्रजापती, गुफरान खान (ठेकेदार), ओमकार निर्गुडे (वास्तुविशारद) यांनी महापालिकेची परवानगी न घेता बांधकाम सुरू केले होते. या अनधिकृत बांधकामाला जी विभाग कार्यालयामार्फत नोटीस बजाविण्यात आली होती. संबधितांनी अनधिकृत बांधकाम स्वत:हून हटविणे आवश्यक होते, परंतु त्यांनी बांधकाम सुरू ठेवले होते. या अनधिकृत बांधकामाला ऐरोली विभाग अधिकारी तथा सहाय्यक आयुक्त नैनेश बदले यांचे नियंत्रणाखाली तोडक मोहीम करण्यात आली. तसेच अनधिकृत बांधकाम हटविण्याचे दंडात्मक शुल्क प्रति पाच हजारांप्रमाणे एकूण १० हजार रुपये वसूल करण्यात आले.