घरकुल कुंजविहार सोसायटीत नवीन जलवाहिनीच्या कामाला सुरुवात
खारघर, ता. ७ (बातमीदार) : घरकुल सेक्टर १५ येथील कुंजविहार सोसायटीमध्ये नवीन जलवाहिनी टाकण्याच्या कामाला सुरुवात झाल्याने रहिवाशांमध्ये समाधानाचे वातावरण आहे. सोसायटीतील चारही इमारतींमध्ये जुनी व जीर्ण झालेली जलवाहिनी अनेक वर्षांपासून गळती देत होती. त्यामुळे पाण्याचा मोठ्या प्रमाणात अपव्यय होत असून, रहिवाशांना तीव्र पाणीटंचाईला सामोरे जावे लागत होते.
या समस्येबाबत सोसायटीच्या पदाधिकाऱ्यांनी नगरसेवक समीर कदम यांच्याकडे पाठपुरावा केला. त्यांच्या पुढाकारातून सिडको अधिकाऱ्यांशी चर्चा होऊन नवीन जलवाहिनी टाकण्यास मान्यता मिळाली. त्यानुसार इमारत क्रमांक १ ते ४ मध्ये जलवाहिनी कामाचा शुभारंभ करण्यात आला. नवीन व्यवस्थेमुळे भविष्यात नियमित व पुरेसा पाणीपुरवठा होईल, असा विश्वास रहिवाशांनी व्यक्त केला आहे.