माणगाव पंचायत समितीवर शिवसेनेचा भगवा फडकला
जिल्हा परिषदेच्या चार जागांपैकी शिवसेना व राष्ट्रवादी काँग्रेसकडे प्रत्येकी दोन जागा
माणगाव, ता. ९ (वार्ताहर) ः रायगड जिल्ह्याचे लक्ष वेधून राहिलेल्या माणगाव तालुक्यातील जिल्हा परिषद आणि पंचायत समिती निवडणुकीचे निकाल जाहीर झाले आहेत. यामध्ये जिल्हा परिषदेच्या चार जागांपैकी शिंदे गट आणि अजित पवार गट यांनी प्रत्येकी २-२ जागा जिंकत आपले वर्चस्व राखले आहे. मात्र, पंचायत समितीच्या आठ पैकी पाच जागांवर विजय मिळवत शिवसेनेने माणगाव पंचायत समितीवर आपला भगवा दिमाखात फडकवला आहे.
माणगाव येथील जिल्हा परिषद व पंचायत समिती निवडणूक राष्ट्रवादी काँग्रेसचे खासदार सुनील तटकरे, मंत्री आदिती तटकरे व शिवसेनेचे मंत्री भरत गोगावले यांनी प्रतिष्ठेची केली होती. यामध्ये शिवसेना पक्षाने जोरदार मुसंडी मारली. जिल्हा परिषदेच्या दोन जागा व पंचायत समितीच्या पाच जागांवर शिवसेनेचे उमेदवार निवडून आल्यावर माणगाव तहसील कार्यालय येथील मैदानात शिवसैनिकांनी घोषणाबाजी व गुलालाची उधळण करीत जयघोष केला, तर राष्ट्रवादी काँग्रेसचा बालेकिल्ला म्हणून ओळखला जाणारा मोर्बा जिल्हा परिषद गट व पंचायत समिती गणातून आणि तळाशेत जिल्हा परिषद गट, पंचायत समिती गण व साई पंचायत समिती गणातून राष्ट्रवादी काँग्रेस पक्षाचे उमेदवार निवडून आल्यावर राष्ट्रवादी पक्षाच्या कार्यकर्त्यांनी विजयाचा जल्लोष केला.

फोटो ओळ -
माणगाव ः येथे जिल्हा परिषद व पंचायत समिती निवडणुकीचा निकाल लागल्यानंतर विजयी उमेदवारांसह कार्यकर्त्यांनी जल्लोष केला.