जव्हारच्या मुख्याध्यापकाचे कर्नाटकात व्याख्यान
जव्हार, ता. ११ (बातमीदार)ः कर्नाटक येथील नॅशनल साहित्य अकादमीत ‘राष्ट्रीय उपन्यास सरणी’ व्याख्यानमालेत जव्हार येथील भारती विद्यापीठ इंग्लिश मीडियम स्कूलचे मुख्याध्यापक डॉ. अर्जुनकुमार राठोड प्रमुख वक्ते म्हणून मार्गदर्शन करणार आहेत.
समाजसुधारक संत सेवालाल महाराज यांच्या २८७ व्या जयंती होणार आहे. यानिमित्ताने रविवारी (ता.१५) दुपारी १२ वाजता गुलबर्गा विद्यापीठ (कर्नाटक) येथे ‘संत सेवालाल महाराज आणि सामाजिक न्याय’ या विषयावर डॉ. राठोड यांचे व्याख्यान होणार आहे. इंग्रजी व मराठी साहित्यातील त्यांचे मोलाचे योगदान, बंजारा समाजाच्या लोकसंस्कृतीवरील अभ्यास तसेच ‘जिप्सी आणि भारतातील भटक्या जमातींचा तुलनात्मक अभ्यास’ या विषयावरील त्यांचा संशोधन प्रबंध याची दखल घेऊन निमंत्रण दिले आहे. या निवडीमुळे जव्हार तालुक्याच्या शैक्षणिक, साहित्य क्षेत्रात अभिमानाचे वातावरण निर्माण झाले आहे. या यशाबद्दल विविध स्तरांतून अभिनंदनाचा वर्षाव होत आहे.