चौल-रेवदंड्यात दहीकाला उत्साहात
रेवदंडा, ता. १६ (बातमीदार): पावसाचा जोर कायम असतानाही चौल-रेवदंडा परिसरात गोकुळाष्टमीचा दहीहंडी उत्सव उत्साहात आणि पारंपरिक पद्धतीने साजरा करण्यात आला. गावातील विविध गोविंदा पथकांनी ढोल-ताशांच्या गजरात थर रचत दहीहंड्या फोडल्या. सकाळी १० वाजल्यापासून सार्वजनिक व खाजगी दहीहंड्या उभारण्यास सुरुवात झाली. दुपारी १२ नंतर गोविंदा पथकांच्या मिरवणुकांना सुरुवात झाली, त्यात अबालवृद्धांनी सहभाग घेतला. अनेक ठिकाणी दहीहंडी फोडण्यासाठी बक्षिसांचीही घोषणा करण्यात आली होती. रेवदंडा पोलिस ठाणे हद्दीत एकूण १३४ सार्वजनिक व २६३ खाजगी दहीहंड्या उभारण्यात आल्या. चौकाचौकात नागरिकांनी मोठी गर्दी केली होती. कोणताही अनुचित प्रकार घडू नये म्हणून पोलीस यंत्रणा सतर्क होती. पावसाची सततची उघडझाप असूनही गोविंदा पथकांचा उत्साह ओसांडून वाहत होता. ओल्या रस्त्यावर थर रचतानाही त्यांनी आत्मविश्वास आणि जोशाने दहीहंड्या फोडल्या. उत्सवाचा आनंद लुटताना परिसरात जल्लोषाचे वातावरण होते.