वाळीत टाकणाऱ्या ३३ जणांवर गुन्हा
रेवदंडा, ता.१२ (बातमीदार) ः अलिबाग तालुक्यातील खैरवाडी-रामराजमध्ये राहणाऱ्या एका कुटुंबाला सप्टेंबर २०२१ पासून वाळीत टाकण्यात आले होते. या प्रकरणात रेवदंडा पोलिसांनी ३३ जणांवर गुन्हा दाखल केला आहे.
अलिबाग तालुक्यातील थळवायशेत गावातील धर्मा गडखल यांच्या मुलाचे २०१९ मध्ये आजारपणामुळे मृत्यू झाला होता. देव देवस्कीतून करणी केल्याने त्याचा मृत्यू झाल्याचा गैरसमज पसरवून २०२१ ला गावातील समाज मंदिरात सभेत साठ हजारांची मागणी करण्यात आली होती. पण फिर्यादीने पैसे देण्यास नकार दिल्याने त्याच रागातून गावकीचे पंच ग्रामस्थांनी कुटुंबाला वाळीत टाकण्याचा निर्णय घेतला. तसेच कुटुंबाबरोबर संबंध ठेवणाऱ्यांना पाच हजारांचा दंड तसेच बोलताना कोणी पकडून दिल्यास एक हजारांचे बक्षिस ठेवले होते. तसेच गावातील समाज मंदिरात प्रवेशबंदी करण्यात आली. या प्रकरणी तुकाराम दरोडा (वय ३९ रा. खैरवाडी-रामराज) यांनी फिर्याद देताच खैरवाडी-रामराजमधील ३३ जणांवर गुन्हा दाखल करण्यात आला.