नवी मुंबई : कोरोना चाचणीकरीता स्वॅब टेस्ट करणाऱ्या खासगी लॅबपैकी थायरोकेअर लॅबला नवी मुंबई पालिकेने नोटीस बजावली आहे. एका कोरोनाबाधित रुग्णाचे वेगवेगळे अहवाल दिल्यामुळे ही नोटीस बजावण्यात आली. 

महत्वाची बातमी : विद्यार्थ्यांनो...! परिक्षेबाबत मुंबई विद्यापीठाने घेतला महत्वपूर्ण निर्णय, वाचा

लॅबमधून आलेल्या वेगवेगळ्या अहवालामुळे कोरोनाबाधित रुग्णावर उपचार करण्यास दिरंगाई झाली. परिणामी त्याचा मृत्यु झाला. याबाबत लॅबवर गुन्हा का दाखल करू नये असे स्पष्टीकरण मागवण्यात आले आहे. वाशीतील एका 70 वर्षीय वृद्धाला त्रास होत असल्यामुळे पीकेसी रुग्णालयात उपचारासाठी भरती करण्यात आले होते. रुग्णालयात भरती केल्यावर 13 मे रोजी त्या रुग्णाचे थायरोकेअर लॅबने कोरोना चाचणीसाठी स्वॅब घेतले. त्यानंतर दोन दिवसांनी चाचणीचे अहवाल निगेटीव्ह आले; मात्र रुग्णाची प्रकृती खालावत गेल्यामुळे त्यांना जुहू गावातील एका रुग्णालयात भरती करण्यात आले. त्यानंतर पुन्हा कोरोना चाचणीसाठी थायरोकेअर लॅबने स्वॅब घेतले. त्या चाचणीचा अहवाल पॉझिटीव्ह आला; मात्र दुसऱ्याच दिवशी रुग्णाची प्रकृती अधिकच गंभीर होऊन त्याचा मृत्यु झाला. 

नक्की वाचा : कौतुकास्पद! दोन महिन्यात तब्बल 10 हजार नागरिकांची तपासणी करणारा योद्धा; वाचा सविस्तर

या प्रकरणी थायरोकेअर लॅबने आधीच व्यवस्थित अहवाल दिला असता तर संबंधित रुग्णावर कोव्हीड-19 विशेष रुग्णालयात उपचार करता आले असते. तसेच त्यांचा जीव वाचवता आला असता; परंतू थायरोकेअर लॅबने एक दिवसाच्या फरकाने केलेल्या चाचणीत चूकीचे अहवाल दिल्यामुळे त्या रुग्णावर कोव्हीड-19 रुग्णालयात उपचार करता आला नसल्याचा ठपका पालिका आयुक्त अण्णासाहेब मिसाळ यांनी ठेवला आहे. तसेच चूकीचे अहवाल दिल्याप्रकरणी तुमच्यावर गुन्हा दाखल का करू नये याबाबत नोटीस ठोठावली आहे. ही नोटीस मिळाल्यापासून 24 तासांच्या आत थायरोकेअर लॅबला पालिकेला स्पष्टीकरण द्यायचे आहे. वेळेवर स्पष्टीकरण न दिल्यास लॅबची परवानगी रद्द करण्याची कारवाई करण्यात येईल असे अण्णासाहेब मिसाळ यांनी सांगितले. 

महत्वाची बातमी : कोरोना झाल्यास पोलिसांवर तातडीने उपचार होणार, महाराष्ट्र कुटूंब आरोग्य योजनेत कोव्हिडचा समावेश

खासगी लॅबचे उखळ पांढरे
सरकारी लॅबवरील ताण कमी होण्यासाठी राज्य सरकारने खासगी लॅबला कोरोना चाचणी करण्याची परवानगी दिली. मात्र त्याचा लॅब चालकांकडून गैरफायदा घेतला जात आहे. कोरोना चाचणी करण्यासाठी सरकारने 4 हजार 500 रूपये दर निश्चित केला आहे. तरीही काही लॅबकडून स्वॅब घेण्यासाठी नागरीकांच्या घरी जाण्याचा प्रवासी भत्ता म्हणून अधिकचे 500 रूपये आकारले जात आहेत. तसेच काही लॅबमध्ये चाचणी केल्यास चाचणीचे अहवाल पॉझिटीव्हच येतात. परंतू असे पॉझिटीव्ह आलेल्या रुग्णांची पुन्हा सरकारी लॅबमध्ये चाचणी केल्यास तीचा अहवाल निगेटीव्ह येत आहे. त्यामुळे हे लॅब खासगी रुग्णालयांसोबत साटेलोटे करून रुग्णांच्या टाळूवरचे लोणी खाण्याच्या तयारीत असल्याचा संशय व्यक्त होत आहे.

 Two different medical reports of the same person, the victim of a corona positive are death