मुंबईः  सोसायटीच्या दुरुस्तीसाठी सिंकीग फंड वापरण्यास परवानगी देण्यासाठी सहकार अधिकाऱ्याने दोन साड्या आणि रोख रक्कम मागितल्याचा प्रकार उघड झाला आहे. या दोन साड्या स्विकारताना या अधिकाऱ्याच्या मुलाला रंगेहाथ पकडण्यात आले आहे. याप्रकरणी लाचलुचपत प्रतिबंधक विभागाने(एसीबी) गुन्हा दाखल केला आहे.

तक्रारदार मालाड पश्चिम येथील एसव्ही रोड येथील एका सोसायटीचे चेअरमन आहेत. नुकतीच त्यांच्या सोसायटीचे दुरुस्तीचे सुरू करण्यात आले होते. त्यासाठी सिंकींग फंड वापरता यावा यासाठी सोसायटीच्या वतीने त्यांनी कांदिवली पूर्व येथील उपनिबंधक सहकारी संस्था येथे लेखी अर्ज केला होता. 

अधिक वाचा-  राज्यभरात आजपासून क्षय, कुष्ठरुग्ण शोध अभियान; आठ कोटींहून अधिक नागरिकांची तपासणी होणार

ती मागणीपूर्ण करण्यासाठी सहकार अधिकारी श्रेणी-1 याने दोन लाख रुपयांची मागणी केली. तसे न केल्यास सोसायटीला डिफॉल्टर घोषित करून कमिटी बरखास्त करण्याची नोटीस बजावण्याची धमकी दिली. त्यांनी पुन्हा संपर्क केला असता उपनिबंधक सहकारी संस्था येथील  सहकार अधिकारी श्रेणी-1 भरत काकड यांनी दोन लाख आणि दोन साड्यांची मागणी केली. लाच देण्याची इच्छा नसल्यामुळे अखेर सोसायटी चेअरमनने याप्रकरणी लाचलुचपत प्रतिबंधक विभागाकडे तक्रार केली. त्यानुसार एसीबीने तपासणी केली असता अधिकाऱ्याने दोन लाख रुपये आणि दोन साड्या मागितल्याचे स्पष्ट झाले. त्यानुसार सापळा रचण्यात आला असता काकड यांना खासगी कार्यालयात दोन लाख रुपये स्विकारताना आणि त्यांचा मुलगा सचिन काकड याला दोन साड्या स्विकारताना रंगेहाथ पकडण्यात आले.

अधिक वाचा-  रद्द विमानप्रवास, सहलींचा परतावा साह्यासाठी, ग्राहक पंचायत सज्ज! प्रवाशांना मार्गदर्शक पत्रके जारी

याप्रकरणी दोघांवरही भ्रष्टाचार प्रतिबंधक अधिनियम 1988 च्या कलम 7 अंतर्गत गुन्हा दाखल करण्यात आल्याचे एसीबीकडून सांगण्यात आले.
---------------------------------

(संपादन- पूजा विचारे)

Two sarees demanded by officer bribe in Malad case filed by ACB