उल्हासनगर : उल्हासनगर महानगरपालिकेच्या (ulhasnagar municipal corporation) खाली वास्तूत गावठी हातभट्टी दारूचा अड्डा (Alcohol production) थाटण्यात आल्याचा प्रकार उघडकीस आला आहे. पालिका आणि पोलिसांनी (Municipal and police action) धाड टाकून हा अड्डा उध्वस्त केला आहे. त्याठिकाणी असलेले दोन भरलेले कॅन, ग्लास, बाक जप्त करण्यात आले असून मध्यवर्ती पोलीस ठाण्यात गुन्हा दाखल करण्याची प्रक्रिया सुरू झाली आहे.

पालिका मुख्यालयाच्या मागेच अग्निशमन दलाच्या बाजूला पालिकेच्या मालकीचे प्रशस्त असे जुने जकात नाक्याचे कार्यालय आहे. जकात सुरू असताना कोणार्क इन्फ्रास्ट्रक्चर हे कार्यालय हाताळत होते. महाराष्ट्र शासनाने जकात बंद केल्यावर तीनचार वर्षांपूर्वी याठिकाणी श्वानांवर नसबंदीची प्रक्रिया हाताळली जात होती. मात्र हे कामही निविदे अभावी ठप्प पडल्याने जकात नाका बंद आहे.

त्याचा गैरफायदा घेणाऱ्या काहींनी याठिकाणी बाक टाकून गावठी हातभट्टी दारूचा अड्डा थाटला होता. ही माहिती समजताच आज दुपारच्या सुमारास मुख्यालय उपायुक्त अशोक नाईकवाडे, सहायक आयुक्त तुषार सोनवणे यांनी मध्यवर्ती पोलीस ठाण्याच्या पोलिसांसोबत धाड टाकली त्यावेळी तळीरामांनी पळापळ केली. पोलिसांनी घटनास्थळी स्टीलचे लहान ग्लास, हातभट्टी दारूचे दोन भरलेले कॅन, मग मिळाले आहेत. याप्रकरणी गुन्हा दाखल करण्याची प्रक्रिया हाताळली जात असून पालिकेच्या वास्तूत अड्डा ठरणाऱ्यांना अटक करण्यात येणार अशी माहिती वरिष्ठ पोलीस निरीक्षक मधुकर कड यांनी दिली.