मुंबई : मुंबई महानगरपालिकेच्या वतीने वीरमाता जिजाबाई भोसले उद्यानात प्रतिवर्षी फेब्रुवारी महिन्यात फुले, फळे व भाज्यांचे प्रदर्शन भरविण्यात येते. त्यामध्ये देशभरातून प्रतिनिधी सहभागी होतात. तथापि, कोविड विषाणू प्रादुर्भावामुळे फेब्रुवारी- 2022 मधील फुले, फळे व भाज्यांचे प्रदर्शन रद्द करण्यात आले आहे. मुंबई महानगरपालिकेच्या वतीने सदर प्रदर्शन जानेवारी महिन्याच्या अखेरच्या आठवड्यात किंवा फेब्रुवारी महिन्याच्या पहिल्या आठवड्यात भरवण्यात येते. प्रदर्शनाचा कालावधी तीन दिवसांचा असतो. या तीन दिवसात अंदाजे दोन ते तीन लाख नागरिक व शाळकरी मुले या प्रदर्शनाला भेट देतात. त्यासोबत प्रदर्शन पाहण्यासाठी विविध मान्यवर तसेच नामांकित मंडळीदेखील आवर्जून भेट देतात. (Mumbai News)

सद्यस्थितीत सर्वत्र कोविड विषाणूचा प्रादुर्भाव कायम असून मुंबईसह देशभराने संसर्गाच्या दोन लाटा अनुभवल्या आहेत. त्यामुळे प्रत्यक्ष प्रदर्शनात सातत्याने एकत्र येणे हे कोविड संसर्गाच्या दृष्टीने धोक्याचे ठरु शकते. तसेच, प्रत्यक्ष प्रदर्शनाच्यावेळी लाखोंच्या संख्येने नागरिकांनी येणे धोक्याचे ठरु शकते. त्यामुळे खबरदारीचा उपाय म्हणून प्रदर्शन रद्द केल्याचे महापालिकेकडून कळवण्यात आले आहे.