कल्याण - कल्याण-डोंबिवली महापालिकेचे स्थायी समिती सभापतिपद डोंबिवलीच्या पदरात पडल्याने नाराज झालेले कल्याणमधील दोघे नगरसेवक बुधवारी स्थायी समितीच्या सभेला गैरहजर राहिले. नवीन सभापती निवडीनंतर स्थायी समितीची बुधवारी पहिली सभा झाली. या सभेत गणेश कोट आणि जयवंत भोईर हे दोघे हजर राहतात की नाही, याकडे सर्वांचे लक्ष लागले होते. 

कोट आणि भोईर यांनी पालिका सचिवांकडे आपले राजीनामे सुपूर्द केले होते. त्यामुळे आगामी महासभेत याबाबतचा प्रस्ताव पटलावर येतो की शिवसेना पक्ष अंतर्गतच समजूत काढून या दोघांची मनधरणी करतो, ते पाहावे लागले. राजीनामे मंजूर झाल्यास नवीन सदस्यांची वर्णी लागू शकते. स्थायी समितीच्या पुढील सभेची तारीख निश्‍चित होईपर्यंत सेनेला या राजीनामानाट्यावर मार्ग काढणे क्रमप्राप्त ठरणार आहे.