मुंबई : कोरोना विषाणूने जगभरात थैमान घातले आहे. अगदी सर्वसामान्यांपासून बड्या नेत्यांपासून ते सेलिब्रेटीपर्यंत कोरोनाने अनेकांना विळखा घातला आहे. हिंदी चित्रपटसृष्टीला कोरोनाचा खूप मोठा फटका बसला आहे. कारण इरफान खान आणि ऋषी कपूर यांच्यासारखे दोन अनमोल हिरे हिंदी चित्रपटसृष्टीने गमावले आहेत आणि त्यातच काल मोहित बघेल या अट्ठावीस वर्षांच्या अभिनेत्याचे निधन झाले आहे. ही बातमी ताजी असतानाच हिंदी चित्रपटसृष्टीला आणखीन एक धक्का बसला आहे. अभिनेता वरुण धवन याच्या मावशीचे निधन झाले आहे. त्याने ही बातमी सोशल मीडियाद्वारे शेअर केली आणि हिंदी चित्रपटसृष्टीत त्याच्या मावशीच्या निधनाबद्दल शोक व्यक्त करण्यात आला.

मोठी बातमी! मुंबईची लाइफलाईन टप्प्याटप्प्याने लवकरच सुरू होणार?

वरुण धवनने अल्पावधीतच हिंदी चित्रपटसृष्टीत नावलौकिक कमावला. मोठमोठी बॅनर्स आणि कलाकारांबरोबर त्याने काम केले. केवळ लव्हर बाॅयची भूमिका न साकारता काही वेगळ्या भूमिकाही त्याने करण्याचा प्रयत्न केला. आता त्याचा कुली नंबर १ हा चित्रपट तयार झालेला आहे आणि चित्रपटगृहे सुरू होताच तो पडद्यावर येणार आहे. आपल्या मावशीच्या निधनाची माहिती त्याने सोशल मीडियावर दिली आहे. तसेच आपल्या मावशीबरोबरच एक फोटोही शेअर केला आहे आणि त्याला कॅप्शन देताना म्हटले आहे की आय लव्ह यू मौसी...आरआयपी..आणि पुढे गायत्री मंत्रही लिहिला आहे. त्याच्या मावशीचे नेमके कशाने निधन झाले ते समजलेले नाही. परंतु वरुणची ती पोस्ट पाहून हिंदी चित्रपटसृष्टीतील अनेक कलाकारांनी त्याच्या मावशीला श्रद्धांजली वाहिली आहे. वरुण धवनचे आपल्या आईबरोबरच मावशीवरदेखील खूप प्रेम आणि जिव्हळा होता. मदर्स डेच्या दिवशी त्याने आईबरोबरच मावशीला शुभेच्छा दिल्या होत्या.