मुंबईः  वसईच्या तुंगारेश्वर मंदिराच्या पायथ्याशी असणाऱ्या अमृत धाम जैन मंदिरात गुरुवार पहाटे 3च्या सुमारास चोरीची घटना घडली आहे.  दोन चोरट्याने मंदिरात प्रवेश करून मंदिरातील पंचधातूंच्या 12 मूर्ती, दानपेटी असा अंदाजे 5 लाख रुपयांचा मुद्देमाल घेऊन चोरटे फरार झाले आहेत. चोरीचा हा सर्व प्रकार मंदिरातील सीसीटीव्ही कॅमेऱ्यात कैद झाला आहे. पोलिसांनी सीसीटीव्ही फुटेज तपासण्यास सुरुवात केली आहे. याबाबत अज्ञात चोरट्या विरोधात वालीव पोलिस ठाण्यात गुन्हा दाखल करण्यात आला आहे. लवकरच चोरट्यांना पकडण्यात येईल असा आशावाद वालीवचे वरिष्ठ पोलिस निरीक्षक विलास चौगुले यांनी व्यक्त केला आहे.

मुंबई अहमदाबाद महामार्गालगत तुंगारेश्वर मंदिराच्या पायथ्याशी अमृतधाम जैन मंदिर आहे. 31 डिसेंबरच्या पार्श्वभूमीवर सर्वत्र पोलिसांचा बंदोबस्त लावण्यात आला आहे. रात्रीची पोलिसांची गस्त ही सुरू आहे. हे सर्व असतानाही दोन चोरट्याने मंदिरात प्रवेश केला. चोरट्यांनी मंदिरातील दानपेटी आणि 11 पंचधातूंच्या मूर्ती घेऊन चोरटे फरार होण्यात यशस्वी झाले आहेत. आज सकाळी मंदिर ट्रस्टला याची माहिती दिल्यानंतर ट्रस्टने याची माहिती वालीव पोलिस ठाण्यात दिली.

मुंबई विभागातल्या ताज्या बातम्या वाचण्यासाठी येथे क्लिक करा.

मंदिराचा प्रश्न असल्याने विरार झोन 03 चे पोलिस उपायुक्त प्रशांत वागुंडे, सहाय्यक पोलिस आयुक्त अमोल मांडवे, वालीवचे वरिष्ठ पोलिस निरीक्षक विलास चौगुले यांनी तात्काळ घटनास्थळावर भेट देऊन घटनेचा पंचनामा केला आहे. मंदिरातील सीसीटीव्ही तपासले असता आज पहाटे 2 चोर चोरी करत असताना सीसीटीव्ही कॅमेऱ्यात कैद झाले आहेत.

हेही वाचा- APMC तील हुक्का पार्लरवर वाशी पोलिसांचा छापा, तरुण-तरुणींसह कर्मचारी ताब्यात

पोलिसांनी सीसीटीव्ही फुटेज ताब्यात घेऊन चोरट्यांच्या शोधासाठी स्वतंत्र पथक तयार केले आहेत. 12 तासाच्या आत चोरटे गजाआड करण्यात येतील अशा विश्वास ही पोलिसांनी व्यक्त केला आहे. चोरी करणाऱ्या चोरट्यांचे तोंड सीसीटीव्ही स्पष्ट दिसत आहेत. त्यामुळे या चोरट्या ना पकडणे पोलिसांना सहज शक्य होईल. पण सरत्या वर्षाच्या शेवटच्या दिवशी चोरीची घटना घडल्याने स्थानिक नागरिक, मंदिर ट्रस्ट यांच्यात एक भीतीचे वातावरण पसरले आहे.

--------------------------

(संपादन- पूजा विचारे)

Vasai Theft Amrit Dham Jain Temple vicinity of Tungareshwar Temple