मुंबई : पंजाब अॅंड महाराष्ट्र को-ऑपरेटिव्ह (पीएमसी) बॅंकेकडून घेतलेल्या कर्जाची वसुली करण्यासाठी एचडीआयएलच्या मालमत्तांचा लिलाव करण्यास हरकत नाही, असे व्यवस्थापकीय संचालक आणि आरोपी सारंग वाधवा यांच्या वतीने बुधवारी मुंबई उच्च न्यायालयाला सांगण्यात आले. त्यामुळे पीएमसी बॅंकेच्या खातेदारांना काहीसा दिलासा मिळण्याची शक्‍यता आहे.

महत्वाचे  माथेरानचे बलवेडीयर पाॅईंट अखेर सुरक्षित

एचडीआयएलचे सारंग वाधवा आणि राकेश वाधवा सध्या न्यायालयीन कोठडीत आहेत. सारंग वाधवा यांच्या वतीने न्यायालयात दाखल करण्यात आलेल्या प्रतिज्ञापत्रात एचडीआयएलच्या मालमत्तांचा लिलाव करण्यास संमती देण्यात आली आहे. पीएमसी बॅंकेचे खातेदार सरोश दमानिया यांनी न्यायालयात केलेल्या जनहित याचिकेवर बुधवारी न्या. रणजीत मोरे आणि न्या. एस. व्ही. तावडे यांच्या खंडपीठापुढे सुनावणी झाली.

हे देखील वाचा गणेश नाईकांच्या अडचणीत वाढ

आरोपींची मालमत्ता जप्त करून तिचा तातडीने लिलाव करावा. मिळालेल्या रकमेतून पीएमसी बॅंकेच्या खातेदारांना पैसे द्यावेत, अशी मागणी या जनहित याचिकेत करण्यात आली आहे. मागील सुनावणीनंतर खंडपीठाने वाधवा यांना खुलासा करण्याचे निर्देश दिले होते आणि त्यांच्या मालमत्तांची यादी मागितली होती. त्यानुसार त्यांच्या वतीने बुधवारी प्रतिज्ञापत्र दाखल करण्यात आले. कर्जफेडीसाठी मालमत्ता विकण्यास आपली हरकत नसल्याचे त्यांनी प्रतिज्ञापत्रात 
म्हटले आहे.