ठाणे : हत्या करून पळून गेलेल्या खुन्याचा शोध घेत असताना 20 वर्षांपूर्वी घर सोडून गेलेल्या तरुण ठाणे पोलिसांना सापडला. मोहम्मद अहमद उर्फ दिल्ली (33) असे या तरूणाचे नाव असून उत्तरप्रदेश राज्यातील एका गावातून 20 वर्षांपूर्वी त्याने घर सोडून धूम ठोकली होती. ठाणे पोलिसांच्या गुन्हे अन्वेषण शाखा युनिट एकच्या हाती लागल्याने त्याला त्याच्या कुटुंबियाच्या स्वाधीन करण्यात आले आहे. कळवा येथील औषध दुकानदाराच्या खूनाच्या प्रकरणात पोलीस आरोपींचा शोध घेत होते. या तपासात पोलिसांना आरोपी सापडला नाही मात्र, घरातून पळून गेलेला मोहमद हाती लागला. 

कळवा येथील औषधालयात काही दिवसांपूर्वी एका तरूणाची गोळ्या झाडून हत्या करण्यात आली होती. याचा तपास ठाणे गुन्हे अन्वेषण शाखा युनीट एककडून सुरू आहे. यात पोलिसांनी सीसीटीव्ही कॅमेऱ्याचे फुटेज आणि खबऱ्याकडून मिळालेल्या माहितीच्या आधारे यातील संशयीत आरोपी माहिम दर्गाह भागात लपला असल्याची कुणकुण पोलिसांना लागली.

ही बातमी वाचा ः  भविष्यात मनसे देणार भाजपला साथ, बाळा नांदगावकर यांचं मोठं वक्तव्य 

या माहितीच्या आधारे वरिष्ठ पोलीस निरीक्षक नितीन ठाकरे यांच्या मार्गदर्शनाखाली सहाय्यक पोलीस निरीक्षक अविराज कुराडे, समीर अहिरराव यांच्या पथकाने आरोपीचा माहिम गाठले. मात्र, संशयीत त्याठिकाणी आढळला नाही. हा संशयीत वांद्रे उड्डाणपूलाखाली असल्याची माहिती मिळताच पोलिसांनी वांद्रे उड्डाणपूलाकडे कूच करून संशयिताला ताब्यात घेतले. चौकशीत त्याने आपले नाव मोहम्मद अहमद असल्याचे सांगितले. मात्र, या खूनामध्ये त्याचा कोणताही संबंध नसल्याचे उघड झाले. 

तरुण मुळचा उत्तर प्रदेशातील 
मोहम्मद हा भीक मागताना आढळून आल्याने पोलिसांनी त्याची विचारणा केली. त्यावेळी त्याने20 वर्षांपूर्वी उत्तरप्रदेश येथील सिक्री येथून घर सोडून पळून आल्याची माहिती पोलिसांना दिली. पोलिसांनी त्याला घरी जाणार का, विचारल्यानंतर त्याने तात्काळ होकार दिला. त्यानंतर पोलिसांनी उत्तरप्रदेश पोलिसांशी संपर्क साधला. त्यावेळी 2000 साली तो हरविल्याची तक्रार उत्तरप्रदेश येथील जनतानगर पोलीस ठाण्यात दाखल असल्याची माहिती मिळाली. त्यानंतर पोलिसांनी त्याच्या घरच्यांशी संपर्क साधून मुंबईतील गोवंडी भागात राहणाऱ्या मोहम्मदच्या भावाला कळवून त्याला सुखरूप कुटुंबियांच्या स्वाधीन केले.