डोंबिवली : महावितरणचा वर्धापन दिनानिमित्त नवीन वीज जोडणीची झिरो पेन्डन्सी हा उपक्रम कल्याण परिमंडळात राबविण्यात आला. यावेळी कल्याण परिमंडलात सर्व पात्र अर्जांवर कार्यवाही करून बुधवारी एकाच दिवसात तातडीने 1 हजार 369 नवीन वीजजोडण्या देत ‘झिरो पेन्डन्सी’चे लक्ष्य साध्य करण्यात आले.

महावितरणचा वर्धापन दिन गुरुवारी मोठ्या उत्साहात साजरा केला जाणार आहे. यानिमित्ताने नवीन वीजजोडणीचा एकही अर्ज प्रलंबित न ठेवण्याचे निर्देश मुख्य अभियंता धनंजय औंढेकर यांनी दिले आहेत. कल्याण परिमंडलात एकूण 1 हजार 232 सिंगल फेज तर थ्री-फेजच्या 137 वीज जोडण्या बुधवारी एकाच दिवशी कार्यान्वित करण्यात आल्या. यात कल्याण मंडल कार्यालय एक अंतर्गत कल्याण पूर्व, पश्चिम व डोंबिवली विभागात सिंगल फेजच्या 278 आणि थ्री फेजच्या 57 वीजजोडण्या देण्यात आल्या.

कल्याण मंडल कार्यालय दोनमधील उल्हासनगर, अंबरनाथ, बदलापूर, मुरबाड, शहापूर भागात सिंगल फेजच्या 332 आणि थ्री फेजच्या 35 वीजजोडण्या देण्यात आल्या. वसई मंडल कार्यालयांतर्गत वसई, विरार, वाडा, नालासोपारा, आचोळे परिसरात सिंगल फेजच्या सर्वाधिक 410 आणि थ्री फेजच्या 24 वीजजोडण्या कार्यान्वित करण्यात आल्या. तर पालघर मंडल कार्यालयातील पालघर, बोईसर, डहाणू, जव्हार, मोखाडा, विक्रमगड परिसरात सिंगल फेजच्या 212 आणि थ्री फेजच्या 2 वीजजोडण्या देण्यात आल्या. या कामगिरीबद्दल मुख्य अभियंता औंढेकर यांनी अधिकारी, अभियंते व कर्मचाऱ्यांचे कौतुक केले.