नांदेड : ज्येष्ठ नेते भास्करराव पाटील खतगावकर (Bhaskarrao Patil Khatgaonkar) यांनी भाजपला सोडचिठ्ठी देत काँग्रेसमध्ये प्रवेश केला आहे. यामुळे देगलूर-बिलोली पोटनिवडणूक आणखीन रंगदार होणार आहे. सार्वजनिक बांधकाम मंत्री अशोक चव्हाण (Ashok Chavan) यांनी खतगावकर यांची स्वागत केले आहे. ते ट्विटमध्ये म्हणतात, की ज्येष्ठ नेते भास्करराव पाटील खतगावकर यांच्या काँग्रेस प्रवेशाच्या घोषणेचे मी स्वागत करतो. त्यांच्या काँग्रेस प्रवेशामुळे नांदेड (Nanded) जिल्हाच नव्हे तर संपूर्ण मराठवाड्यातील पक्ष संघटनेला अधिक बळकटी मिळेल, याचा मला विश्वास आहे.

पुढे अशोक चव्हाण म्हणतात, की काँग्रेस प्रवेशाची घोषणा करणारे माजी आमदार ओमप्रकाश पोकर्णा व त्यांच्या इतर सहकाऱ्यांचेही मी पक्षात स्वागत करतो. त्यांच्यामुळे काँग्रेस पक्ष अधिक मजबूत होईल. तसे पाहिले तर खतगावकर हे पूर्वाश्रमीचे काँग्रेसचे. आता त्यांनी घरवापसी केली आहे.