बिलोली (जि.नांदेड) - बिलोली (Biloli) येथील तहसील कार्यालयातील अव्वल कारकून धोडिंबा कोकाटे यास दोन हजार रुपयांची लाच घेताना बुधवारी (ता. १५) पकडण्यात आले. तक्रारदार आणि त्याच्या भावाच्या मालमत्तेच्या वादात बिलोली तालुका दंडाधिकाऱ्यांच्या समक्ष प्रस्ताव ठेवण्यासाठी नऊ सप्टेंबरला धोडिंबा नारायण कोकाटे (वय ४७, रा. काबरानगर, नांदेड, सध्या रा. बिलोली) (Nanded) याने पाच हजारांची मागणी केली. तक्रारदाराने लाचलुचपत प्रतिबंधक कार्यालयात (Anti Corruption Bureau) तशी तक्रार दिली. कोकाटे याने पाच हजार लाचेची मागणी करून दोन हजारांवर तडजोड केल्याचे पडताळणीत निष्पन्न झाले.

त्यानंतर विभागाच्या पथकाने येथे सापळा लावला. त्यावेळी दोन हजार स्वीकारताना कोकाटे याला अटक केली. त्याच्याविरुद्ध येथील पोलिसांत गुन्हा दाखल झाला. पोलिस अधीक्षक कल्पना बारवकर, अतिरिक्त पोलिस अधीक्षक अर्चना पाटील, उपअधीक्षक धरमसिंग चव्हाण, राजेंद्र पाटील, निरीक्षक शेषराव नीतनवरे यांच्या मार्गदर्शनाखाली उपअधीक्षक अशोक इप्पर, निरीक्षक अरविंद हिंगोले, पोलिस नायक किशन चिंतोरे, जग्गनाथ अनंतवार, ईश्वर जाधव, मुजीब शेख आदींनी ही कारवाई केली.