नांदेड : आघाडी सरकारने किराणा दुकानात वाईन विक्री सुरू करण्याचा घेतलेला निर्णय रद्द करावा, म्हणून नांदेड महानगर भाजपा महिला आघाडीच्या वतीने सोमवारी (ता.१४) आंदोलन करण्यात आले.

जिल्हाध्यक्ष प्रवीण साले व सरचिटणीस अॅड. दिलीप ठाकुर, महिला आघाडी जिल्हाध्यक्ष नगरसेविका वैशाली देशमुख व प्रदेश कार्यकारिणी सदस्य डॉ. शीतल भालके यांच्या नेतृत्वात हे आंदोलन झाले. किराणा दुकानात महिला व लहान मुलांचा सतत वावर असल्याने हा निर्णय चुकीचा असल्याचे भाजपासह अनेक नागरिक सांगत आहेत. या निर्णयामुळे भावी तरुण पिढी बर्बाद होण्याची शक्यता वर्तवली जात असल्याने, तो निर्णय रद्द करण्यात यावा, अशी मागणी भाजपा महिला आघाडीच्या वतीने करण्यात आली.

महाराष्ट्र महिला आयोगाच्या अध्यक्षा रुपाली चाकणकर यांनी दारु विक्री निर्णयाचे स्वागत केले म्हणून त्यांना एक हजार महिलांच्या भावना पत्राद्वारे पोस्ट करण्यात आली. दरम्यान, आंदोलनकर्त्यांनी आघाडी सरकार विरोधात जोरदार घोषणाबाजी करत निषेध व्यक्त केला. या आंदोलनात महिला आघाडीच्या शततारका पांढरे, सुषमा ठाकुर, अपर्णा चितळे, अश्विनी जाधव, कांचन गहलोत, मंडळ अध्यक्ष संदीप कऱ्हाळे, भाजपा प्रवक्ता धीरज स्वामी, चिटणीस कुणाल गजभारे, सोशल मीडियाचे बाळु लोंढे, अक्षय अमिलकंठवार आदींसह पदाधिकारी कार्यकर्ते सहभागी झाले होते.