नांदेड : रुग्णालयासाठी लागणारी लेप्रोस्कोपिक सिस्टिम बसवून देतो म्हणून पुण्याच्या एका सर्जिकल कंपनीच्या संचालकाने शहरातील एका डॉक्टरला सुमारे अडीच लाखांचा गंडा घातला. याप्रकरणी डॉ. बोंबले यांच्या फिर्यादीवरुन नांदेड ग्रामीण पोलिस ठाण्यात सर्जिकल कंपनीचा संचालक अविनाश वैराटविरुद्ध फसवणुकीचा गुन्हा दाखल करण्यात आला आहे.

येथील कै. शंकरराव चव्हाण शासकीय वैद्यकीय महाविद्यालयात कार्यरत असलेले डॉक्टर सुनील बोंबले यांची पुणे येथे राहणाऱ्या अविनाश वैराट याच्यासोबत मैत्री झाली. यावेळी आपली विजय सर्जिकल नावाची कंपनी असून वैद्यकीय सेवेसाठी लागणारी यंत्रसामग्री सप्लाय करतो असे सांगितले. विश्वास बसावा म्हणून वैराट यांनी काही किरकोळ अशी यंत्रसामग्री देऊन विश्वास संपादन केला. तुम्हाला लागणाऱ्या लॅप्रोस्कॉपी सिस्टिम देखील बसविण्याचे आम्ही काम करतो. त्यासाठी साडेचार लाख रुपये खर्च लागेल.

हेही वाचा -  फौजदार होण्याचे सलमानचे स्वप्न हे स्वप्नच राहिले, प्रशिक्षणासाठी जाताना झाला अपघातात मृत्यू -

परंतु त्यासाठी अर्धी रक्कम भरावी लागेल असे वैराट यांनी डॉक्टर बोंबले यांना सांगितले. ही बाब गेल्या ऑगस्ट- २०१९ महिन्यातील आहे. वैराट याने लपरोस्कॉपिक सिस्टीम किती उच्च दर्जाचे आणि किफायत दरातील आहे हेसुद्धा पटवून दिले. ठरलेल्या व्यवहारामुळे डॉक्टर बोंबले यांनी संबंधित अडीच लाख रुपये त्यांच्या बँक खात्यावर ट्रान्सफर केले. पैसे मिळताच लाप्रोस्कॉपिक सिस्टीम लावणे तर दूरच पण पैसे परत करण्याची तयारीदेखील अविनाश वैराट दाखविली नाही. आज- उद्या पुढच्या महिन्यात पैसे परत करतो म्हणून चालढकल सुरु झाली तर कधी लाॅकडाऊनचे कारण समोर करण्यात येत होते. वर्ष होऊनही पैसे परत करण्यास संबंधित वैराट हा थापा मारत असल्याने डॉक्टर बोंबले यांनी नांदेड ग्रामीण पोलिस ठाण्यात जाऊन तक्रार नोंदविली. त्यांच्या तक्रारीवरुन गुन्हा दाखल करण्यात आला आहे. तपास सहाय्यक पोलिस निरीक्षक रवींद्र सांगळे करत आहेत.