नांदेड : लाईट का गेली असा जाब विचारत वाईबाजार येथील ३३ केव्ही उपकेंद्रातील कार्यालयात येऊन टेबलावरील कागदपत्रे फाडत उपस्थित कनिष्ठ अभियंता व कर्मचाऱ्यास शिवीगाळ व धक्काबुक्की केल्याची घटना काल (ता.16) घडली. याप्रकरणी धक्काबुक्की करणारे वीजग्राहक सुरज खोडके याच्या विरोधात गुन्हा दाखल करण्यात आला आहे.

मंगळवारी (ता.15) रात्री वाईबाजार येथील आठवडी बाजार येथील रोहीत्रावरील एक फेज गेल्यामुळे रात्री आठ वाजता वीजपुरवठा खंडीत झाला होता. त्यामुळे सुरज खोडके या वीजग्राहकांने लाईट का गेली असे म्हणत कनिष्ठ अभियंता सुरेशसिंग राठोड यांना मोबाईलवर शिवीगाळ केली तसेच उपकेंद्रातील बाह्यस्त्रोत कर्मचाऱ्यासही अर्वाच्च भाषेत शिवीगाळ करत मारण्याची धमकी दिली.

हेही वाचा - किनवट तालुक्यात पडलेल्या मुसळधार पावसामुळे चालु असलेल्या महामार्गाच्या पुलांच्या कामादरम्यान निर्माण केलेल्या बाजुचे प्रासंगिक पुल वाहुन गेल्याने वाहतुक खोळंबली

कर्मचारी फ्युज टाकायला गेला आहे, थोड्यावेळात वीजपुरवठा सुरु होईल असे समजावून सांगितले. दुसऱ्या दिवशी (ता.16) वाईबाजार येथील ३३ केव्ही उपकेंद्रातील कार्यायात येवून सुरज खोडके याने तेथे कर्तव्यावर उपस्थित असलेले कनिष्ठ अभियंता सुरेशसिंग राठोड व त्यांचे सहकारी यांना अर्वाच्च भाषेत शिवीगाळ करत धक्काबुक्की केली. त्याचबरोबर कागदपत्रे फाडत खुर्च्या व टेबलाची नासधुस करत शासकीय कामात दहशत निर्माण करुन अडथळा निर्माण केला.

झाल्या प्रकाराबाबत सिंदखेड पोलिस ठाण्यात शिवीगाळ करत धक्काबुक्की करणाऱ्या सुरज खोडके याच्या विरोधात सरकारी कामात अडथळा आणून मारहाण केल्याबाबत भारतीय दंड संहितेच्या कलमान्वये गुन्हा दाखल करण्यात आला आहे.