नांदेड : स्वामी रामानंद तीर्थ मराठवाडा विद्यापीठात भारत सरकारच्या केंद्रीय सतर्कता आयोगातर्फे दर वर्षी ‘दक्षता जागरुकता आठवडा’साजरा केला जातो. यावर्षी हा आठवडा ता. २७ ऑक्टोबर ते ता. दोन नोव्हेंबर या दरम्यान साजरा करण्यात आला. या अनुषंगाने विद्यापीठातर्फे विद्यापीठ व संलग्नित सर्व महाविद्यालयाच्या विद्यार्थ्यांसाठी “माझे ध्येय भ्रष्टाचार मुक्त भारत/ मेरा लक्ष्य भ्रष्टाचार मुक्त भारत” या विषयावर निबंध स्पर्धेचे आयोजन केले आहे. असे विद्यापीठाचे कुलगुरु डॉ. उद्धव भोसले यांनी कळविले आहे.

विद्यार्थ्यांनी निबंध मराठी किंवा हिंदी या एकाच भाषेत दिलेल्या विषयावर लिहावा. यासाठी किमान शब्दमर्यादा १,२०० ते १,५०० शब्द आहे. निबंध पाठवीत असतांना सोबत प्राचार्य यांचे पत्र पाठविणे आवश्यक आहे. या स्पर्धेतील विजेत्यांना प्रथम पारितोषिक सात हजार, द्वितीय पारितोषिक पाच हजार आणि तृतीय पारितोषिक तीन हजार रुपये रोख व प्रमाणपत्र देण्यात येईल.

हेही वाचा -  नांदेड : रब्बीसाठी विद्यूतप्रणालीची देखभाल व दुरुस्तीची कामे वेळेत पूर्ण करा- मुख्य अभियंता पडळकर -

निबंध १० नोव्हेंबरपर्यंत पाठवावेत

सदर स्पर्धा विद्यापीठाशी संलग्नित सर्व महाविद्यालये, विद्यापीठ परिसर, विद्यापीठ उपकेंद्र लातूर, परभणी तसेच न्यू डिग्री मॉडल कॉलेज, हिंगोली आणि कै. उत्तमराव राठोड आदिवासी विकास केंद्र किनवट येथील सर्व विद्यार्थ्यांसाठी आहे. सदर निबंध आणि सोबत प्राचार्यांचे पत्र ता. १० नोव्हेंबरपर्यंत dsdsrtmun@gmail.com या संकेतस्थळावर पाठवावे. उशिरा आलेल्या निबंधाचा स्पर्धेसाठी विचार केला जाणार नाही. असे आवाहन विद्यार्थी विकास विभागाचे संचालक डॉ. ज्ञानोबा मुंढे यांनी केले आहे.