नांदेड : कोरोना महामारीच्या काळात प्रदीर्घ कालावधीनंतर सुरू झालेल्या महापालिकेच्या शाळांना प्रशासकीय स्तरावरील सर्व मदत करणार. तसेच या शाळांना सर्व सुविधा उपलब्ध करून देण्यासाठी आपण प्रयत्न करू, प्रत्येक शाळा डिजीटल होण्यासाठी आपण पुढाकार घेऊ, असे आश्वासन महापौर जयश्री निलेश पावडे यांनी मंगळवारी (ता. १४) दिले.

नांदेड वाघाळा महापालिकेच्या सर्व शाळेचे मुख्याध्यापक आणि शिक्षकांची आढावा बैठक महापौर पावडे यांच्या अध्यक्षतेखाली घेण्यात आली. त्यावेळी त्या बोलत होत्या. यावेळी शिक्षण महिला व बालकल्याण समिती सभापती संगीता पाटील डक, शिक्षणाधिकारी राजेश पातळे यांची प्रमुख उपस्थिती होती. महापौर पावडे यांनी कोरोनानंतर सुरु झालेल्या शाळेतील विद्यार्थ्यांची उपस्थितीच्या माध्यमातून दिलेल्या प्रतिसादाची माहिती घेतली.

सर्व शाळांमधील विद्यार्थी संख्या, शिक्षकांची संख्या, शाळेमध्ये उपलब्ध असलेल्या सुविधां याबाबत माहिती घेतानाच सर्व शिक्षकांना सकारात्मक ईच्छाशक्ती ठेवून अधिक चांगल्या पध्दतीने अध्यापनाचे काम करण्याचे सुचित केले. अशा पद्धतीने काम केल्यास विद्यार्थी शाळेतील विद्यार्थीसंख्या वाढीस मदत होईल. असे त्या म्हणाल्या.

शाळांमध्ये प्रशासकीय सुविधांबाबतीत येत असलेल्या अडचणी कळविण्याचे सुचित केले व त्या अडचणी सोडविण्यासाठी सर्व प्रशासकीय पातळीवर प्रयत्न करण्याचे आश्वासित केले. मुख्याध्यापक व शिक्षकांनी संबंधित शाळेच्या परिसरातील पालकांशी संपर्क करुन विद्यार्थी संख्या वाढीवर भर द्यावा, अशा सूचनाही महापौरांनी केल्या. महापालिकेच्या सर्व शाळा डिजीटल करण्यासाठी डिजीटल माध्यमातून अध्यापनाचे काम करण्याकरीता सुचना जाणून घेतल्या व डिजीटल शाळा कार्यान्वित करण्यासाठी प्रयत्न करणार असल्याचे आश्वासन दिले.

यावेळी येत्या प्रजासत्ताक दिनाच्या अनुषंगाने प्रतिवर्षाप्रमाणे आयोजित केल्या जाणा-या स्पर्धा व सांस्कृतिक कार्यक्रमाचे नियोजनाची माहिती देण्याची सुचना केली. या बैठकीत मुख्याध्यापक आणि शिक्षकांचे मनोबल वाढविण्यासाठीही महापौर पावडे यांनी संवाद साधला.