नांदेड : शहरापासून दहा किलोमीटर अंतरावर असलेल्या विष्णुपुरी येथील डॉ. शंकरराव चव्हाण शासकीय वैद्यकीय महाविद्यालय व रुग्णालयातील अतिदक्षता विभागात नॉन कोवीड रुग्णांसाठी डायलिसीस मशिन कार्यान्वित करण्यात आली आहे. अधिष्ठाता डॉ. सुधीर देशमुख यांच्या हस्ते या मशीनचा लोकार्पण सोहळा संपन्न झाला.

यावेळी रुग्णालयाचे वैद्यकीय अधीक्षक डॉ. वाय. एस. चव्हाण, प्राध्यापक व औषधवैद्यक विभागप्रमुख डॉ. भुरके, सहयोगी प्राध्यापक डॉक्टर श्रीमती राठोड, कपिल मोरे, डॉ. कापसे, नियोजन अधिकारी डोळे आदींची प्रमुख उपस्थिती होती. किडनी आजाराच्या रुग्णांना या मशीनचा मोठा फायदा होणार आहे. महात्मा ज्योतिबा फुले जन आरोग्य योजनेअंतर्गत आणखी चार ते पाच डायलिसीस मशिन उपलब्ध करुन घेण्याचा प्रस्ताव शासनाकडे पाठविला असून त्याचा पाठपुरावा केला जाणार असल्याचे अधिष्ठाता डॉक्टर देशमुख यांनी सांगितले.

हेही वाचा - नांदेड : ज्येष्ठांच्या समस्या सोडविण्याचा ‘फेस्कॉम’चा संकल्प -

डायलिसीस मशिनसाठी रुग्णालयात स्वतंत्र विभागाची रचना करण्यात यावी अशा सूचनाही त्यांनी दिल्या. खासगी रुग्णालयात डायलिसीस मशिनसाठी रुग्णांना मोठ्याप्रमाणावर खर्चाला सामोरे जावे लागते. ग्रामीण भागातून येणाऱ्या बहुतांश रुग्णांना पैशाअभावी डायलिसीस मशिनची सेवा मिळू शकत नाही. परंतु शासकीय रुग्णालयात ही सुविधा उपलब्ध झाल्यामुळे या रुग्णालयात उपचार घेणाऱ्या सर्व रुग्णांना आवश्यकतेनुसार ही सुविधा उपलब्ध झाली आहे. गरजेनुसार नेफरोलॉजिस्ट याचा अभिप्राय घ्यायचे असेल तर त्यांना बोलावून रुग्णावर उपचार केले जातील तसेच याबाबतचा खर्च रुग्णालयात प्रशासनामार्फत केला जाणार असून रुग्णांकडून कोणतेही शुल्क आकारले जाणार नाही असे डॉ. सुधीर देशमुख यांनी सांगितले.