अर्धापूर (जिल्हा नांदेड) : अवैध वाळू उपसा प्रकरणी दोन वेगवेगळ्या घटनाप्रकरणी अर्धापूर पोलिस ठाण्यात सहा जणांविरूध्द गुन्हा दाखल करण्यात आला आहे. पहिल्या घटनेत चोरून वाळू वाहतूक केल्याप्रकरणी टिप्पर चालक व मालका विरूद्ध तर वाळू उपसा करुन वाहतुकीस अडथळा का केला म्हणून मंडळ अधिकाऱ्यांसबत वाद घातल्याने गुन्हा दाखल करण्यात आला आहे. यातील चार जणांना पोलिसांनी अटक केली आहे.

या बाबत पोलिस सुत्रांकडून मिळालेली माहिती अशी की, अर्धापूर- नांदेड रस्त्यावरील पिंपळगाव पाटी परिसरातील राजयोग धाब्याजवळ अवैध वाहतूकीच्या संदर्भात मंगळवारी (ता. तीन) रात्री नऊच्या सुमारास टिप्पर चालक आपल्या ताब्यातील टिप्पर (एमएच- 26 बी. ई.4043) मध्ये अवैधरित्या वाळूची वाहतूक करित असताना निदर्शनास आला. या टिप्परचालक व मालकाविरूद्ध ३० हजाराची वाळू चोरी प्रकरणी अर्धापूरचे नायब तहसीलदार मारोतराव जगताप यांच्या फिर्यादीवरून गुन्हा दाखल करण्यात आला आहे.

हेही वाचा -  तलाठी असलेल्या बापाने पुसले लेकीचे कुंकू : असे काय होते कारण ? 

शासकीय कामात अडथळाप्रकरणी चार जणाविरूद्ध गुन्हा

अर्धापूर तहसील कार्यालयातील मंडळ अधिकारी म्हणून कार्यरत असलेले प्रफुल्ल खंडागळे यांना कोंढा (ता. अर्धापूर) येथील नदी पात्रातील अवैध वाळू उपसा होत असल्याची माहिती मिळाली. या माहिती आधारे ते कोंढा येथील नदी परिसरात गेले. यावेळी अवैध वाळू उपसा करणारा टेम्पो (एम.एच 04 सीजी 4783) वाळूसह जप्त केला. यावेळी कोंढा येथील चार जणांनी संगनमत करून त्यांना दमदाटी करून शासकीय कामात आडथळा निर्माण केला. ही घटना मंगळवारी (ता. तीन) मध्यरात्री नंतर घडली आहे. या प्रकरणी प्रफुल्ल खंडागळे यांनी दिलेल्या फिर्यादीवरून चौघाविरुद्ध गुन्हा दाखल झाला आहे. या प्रकरणी पुढील तपास पोलिस उपनिरिक्षक बळीराम राठोड करित आहेत.

अर्धापूर तालुक्यात अवैध वाळू उपसा सुरुच

अर्धापूर तालुक्यातील छोट्या- मोठ्या नदी- नाल्यातून सर्रासपणे अवैध वाळूचा उपसा सुरू आहे. नदी- नाल्यात वाळू उपशामुळे नदीत खड्डे पडले असून हा अवैध वाळू तस्करी करणा-यांचे एक मोठे जाळे निर्माण झाले आहेत. ताबडतोब आर्थिक लाभ देणा-या वाळूच्या व्यवसायात प्रत्येक पक्षाचे पदाधिकारी व कार्यकर्ते गुंतलेले आहेत. सर्वांचे या व्यवसायात एकमत असून वाळूचा खेळ रात्री चालू असतो. 

संपादन - प्रल्हाद कांबळे