लोहा : तालुक्यातील दोन वेगवेगळ्या घटनेत मंगळवारी (ता. १४) दोघींनी आत्महत्या केल्याची घटना उघडकीस आली. त्यामध्ये एक १९ वर्षीय विवाहिता तर दुसरी चौदा वर्षीय अल्पवयीन मुलीचा समावेश आहे.

पिंपळगाव (ढगे) (ता. लोहा) येथील जनार्दन डुबुकवाड यांची मुलगी रुपाली (वय १९) हिचा गेल्या सात महिन्यांपूर्वी दहीकळंबा (ता. कंधार) येथील सोपान पल्लडवाड याच्याशी विवाह झाला होता. सदरील दांपत्य ऊस तोडी कामावरून मागील तीन दिवसापूर्वीच गावी परतले होते. विवाहिता रुपाली ही मंगळवारी (ता. १४) सकाळी अकरा वाजता माहेरी परत आली होती. दुपारी बारा वाजेनंतर रुपाली आईसोबत शेताकडे गेली असता थोड्यावेळाने येते, असे सांगून गेली.

बराच वेळ रुपाली आली नसल्यामुळे तिची शोधाशोध सुरु झाली. दुपारी साडेचार वाजेदरम्यान गावापासून दोन किलोमीटर अंतरावर असलेल्या एका विहिरीवर चप्पल असल्याचे निदर्शनास आल्याने विहिरीत गळ टाकून शोधले असता सदरील विवाहितेचा मृतदेह अढळून आला. या प्रकरणी विवाहितेचा माहेरकडील कुटुंबियांनी पोलिसांना दिलेल्या माहितीवरून लोहा पोलिस ठाण्यात आकस्मिक मृत्यूची नोंद करण्यात आली आहे. दुसऱ्या घटनेत तालुक्यातील आडगाव तांडा येथील काजल आनंदा पवार (वय १४) ही अल्पवयीन मुलगी मंगळवारी (ता. १४) सकाळी उशीरापर्यंत झोपेतून उठली नाही.

आईने तिला रागविले त्यामुळे त्याचा राग तिच्या मनात होता. दुपारी आई गुरे घेवून शेताकडे गेली तर काजल देखील शेळी घेऊन पेनुर शिवारातील शेतात गेली होती. काही वेळाने दुपारी अडीचच्या सुमारास काजलची आई गुरे चारत असताना काजल ही कपाशीच्या शेतातील चिंचेच्या झाडास दोरीच्या साह्याने गळफास घेतलेल्या अवस्थेत आढळून आली. या प्रकरणी रावसाहेब राठोड यांनी दिलेल्या माहितीवरून लोहा पोलिस ठाण्यात आकस्मिक मृत्यूची नोंद करण्यात आली आहे.