नवीन नांदेड : पदवी व पदव्युत्तर वर्षाच्या अंतिम वर्षाच्या परीक्षा घेण्यास विद्यापीठ अनुदान आयोगाने सूचित केले आहे. कोरोनाच्या कठीण परिस्थितीत परीक्षा रद्द करण्याच्या मागणीसाठी ‘मास’ विद्यार्थी संघटना आक्रमक झाली असून केंद्र आणि राज्य शासनाच्या राजकीय संघर्षात विद्यार्थी भरडला जात आहे, असे मत ‘मास’ विद्यार्थी संघटनेचे विभागीय अध्यक्ष श्रीकांत जाधव यांनी व्यक्त केले आहे.
सरसकट उत्तीर्ण करण्याचा निर्णय
विद्यापीठ अनुदान आयोगाने पदवी आणि पदव्युत्तर वर्गाच्या अंतिम सत्राच्या परीक्षा घेण्याची परवानगी दिली आहे. देशभरातील विद्यापीठांना आयोगाच्या आदेशाचे पालन करणे बंधनकारक आहे. या आदेशापूर्वी राज्य सरकारने परीक्षा रद्द करून मागील सत्रातील गुण गृहीत धरून सरसकट उत्तीर्ण करण्याचा निर्णय घेतला होता. तसेच ‘एटीकेटी’ असणाऱ्या विद्यार्थ्यांना देखील पुढील वर्गात प्रवेश देण्यात येणार होता.
इतर राज्यांनी विरोध केला
राज्यातील भयावह कोरोना परिस्थितीत परीक्षा घेणे शक्य नाही, असे राज्य सरकारने स्पष्ट केले होते. त्यानंतर यूजीसीने परीक्षा घेण्याची सूचना केली आहे. या निर्णयाला महाराष्ट्र आणि इतर राज्यांनी विरोध केला आहे. केंद्र आणि राज्य सरकारचा वाद सुरू असताना विद्यार्थी संघटनाही मैदानात उतरल्या आहेत. मराठवाडा असोसिएशन फॉर स्टुडंटने (मास) विभागीय अध्यक्ष श्रीकांत जाधव यांच्या नेतृत्वाखाली रविवारी (ता.१२) परीक्षेला विरोध करणारी मोहीम राबवली.
खेडेगावातील विद्यार्थ्यांनी परीक्षा कशी द्यावी?
केंद्रीय मनुष्यबळ विकासमंत्री रमेश पोखरियाल यांना हजारो विद्यार्थ्यांनी ई-मेलद्वारे परीक्षा रद्द करण्याची विनंती केली आहे. विद्यापीठ अनुदान आयोग सतत वेगवेगळ्या सूचना देत असून विद्यार्थ्यांमध्ये संभ्रम वाढला आहे. यूजीसीने अंतिम वर्षाच्या परीक्षा घेण्यासंदर्भात दिलेली मार्गदर्शक तत्त्वे म्हणजे सर्वांनाच धक्का आहे. महाराष्ट्रातील कोविड-१९ ची परिस्थिती माहीत असताना हा निर्यय म्हणजे अंतिम वर्षाच्या विद्यार्थ्यांच्या जिवाशी खेळल्यासारखे आहे. अशा निर्णयामुळे पुढील शैक्षणिक वर्षाला उशीर होणार आहे. पायाभूत सुविधा उपलब्ध नसलेल्या गावातील विद्यार्थ्यांनी परीक्षा कशी द्यावी, असा सवाल मास विद्यार्थी संघटनेने विचारला आहे. तसेच विद्यार्थीहिताचा निर्णय घेत परीक्षा रद्द करावी, अशी मागणी केली आहे.
संपादन - स्वप्निल गायकवाड
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.