नांदेड : गुरुवारी (ता.सात मे) प्रलंबीत असलेल्या ५१ जणांपैकी शुक्रवारी (ता. आठ) २३ अहवाल प्राप्त झाले असून, त्यात २० निगेटिव्ह तर तीन पॉझिटिव्ह रुग्ण निघाले आहेत. त्यामुळे आता नांदेडमधील रुग्णांची संख्या ३८ वर गेली आहे. त्यापैकी चौघांचा मृत्यू झाल्याची माहिती जिल्हा शल्य चिकित्सक डॉ. निळकंठ भोसीकर यांनी दिली आहे.

मागील तीन दिवसांपासून शहरात एकही कोरोना पॉझिटिव्ह रुग्ण येत नसल्याने नांदेडकरांमध्ये दिलासा निर्माण झाला होता. परंतु, शुक्रवारची पहाट नांदेडकरांसाठी पुन्हा चिंतेची ठरली आहे. गुरुवारी एकूण ५१ जणांचे स्वॅब तपासणीसाठी पाठविण्यात आले होते. त्यापैकी शुक्रवारी २३ जणांचे अहवाल प्राप्त झाले असून, त्यात २० निगेटिव्ह तर तीघांचा अहवाल पॉझिटिव्ह आला आहे. त्यामुळे नांदेडकरांच्या चिंतेत वाढ झाली असून, अत्यावश्‍यक कामाशिवाय घराच्या बाहेर पडू नका, असे आवाहन जिल्हा प्रशासनाच्या वतीने करण्यात आले आहे.

हेही वाचा - दिलासादायक : ‘त्या’ चार पॉझिटीव्हपैकी एक सापडला

गुरुद्वार लंगरसाहेब येथे अडकलेल्या भाविकांना पंजाबला सोडण्यासाठी गेलेल्या चार ड्रायव्हरांना परत आल्यावर कोरोनाची बाधा झाली. त्यामुळे गुरुद्वारा परिसरातील ९७ संशयितांच्या स्वॅब घेऊन तपासणीसाठी पाठविण्यात आले होते. त्यापैकी २० जणांचा अहवाल कोरोना पॉझिटिव्ह आल्याने नांदेडकरांसह जिल्हा प्रशासन हादरून गेले होते. या २० पैकी चारजण प्रशासनाच्या हरगर्जिपणामुळे फरार झाले. त्यापैकी एकाला पकडण्यात पोलिसांना यश आले असून, अद्‍यापही तीघेजण फरारच आहेत.  

शुक्रवारी सापडलेल्या तीन कोरोना बाधितांपैकी दोन रुग्ण हे अबचलनगर येथील असून, त्यात ३६ वर्षीय महिला व ३८ वर्षीय पुरुषाचा तर रविनगर (कौठा) येथील एका ३५ वर्षीय व्यक्तीचा त्यामध्ये समावेश आहे. हे तीन्हीही रुग्ण आधीच्या रुग्णांच्या संपर्कातील असून, त्यांच्यावर शासकीय रुग्णालयात भरती करण्यात आले आहे. त्यांची प्रकृती सध्या स्थिर असल्याचे जिल्हा शल्यचिकित्सक डॉ. निळकंठ भोसीकर यांनी सांगितले. नागरिकांनी घाबरून न जाता, तसेच अफवांवर विश्‍वास न ठेवता घरातच थांबण्याचे आवाहनही डॉ. भोसीकर यांनी केले आहे.