नांदेड - कोरोना रुग्णांची संख्या एकीकडे वाढत असताना दुसरीकडे कोरोना चाचणीसाठी येणाऱ्या नागरिकांना विनाकारण मनस्ताप सहन करावा लागत आहे. एनआरआय भवनऐवजी नाना-नानी पार्क येथे सुरू करण्यात आलेल्या क्लिनिकसमोरच पावसामुळे रस्त्यावर नाल्यांचे घाण पाणी आले आहे. गटाराचे घाण पाणी साचत असल्यामुळे कोरोनाची चाचणी करण्यासाठी येणाऱ्या नागरिकांना त्या पाण्यातून ये-जा करावी लागत आहे. 

शिवाजीनगर भागामधील नाना - नानी पार्कच्या समोरच महापालिकेचे आरोग्य रुग्णालय आहे. त्याच्या शेजारच्या मोकळ्या भूखंडात गटाराचे पाणी सोडण्यात आले आहे. त्यातच पाऊस पडल्यामुळे आणखी घाण वाढली आहे. नाना-नानी पार्कसमोरील रस्त्यावर हे घाण पाणी साचत आहे. त्यातच पाऊस आल्यास रस्त्यावर एक फुटापर्यंत पाणी साचत आहे. पाणी जाण्यासाठी कुठेही जागा नाही, तसेच महापालिकेच्या वतीने पाणी जाण्यासाठी कुठलेही प्रयत्न केले जात नसल्यामुळे घाण पाणी रस्त्यावर साचून राहत आहे. 

हेही लाचा- बंडूनानाला दुपारी जेवण करुन झोपणे पडले महागात...

स्वच्छता विभागाने त्याकडे दुर्लक्ष 

तसेच या रस्त्यावर अनेक ठिकाणी मोठे खड्डे पडले आहेत. त्यामुळे पाण्यातून गाडी चालवताना वाहनधारकांचे हाल होत आहेत. पावसाळा संपत आला तरी महापालिकेच्या स्वच्छता विभागाने त्याकडे दुर्लक्ष केले आहे. त्यामुळे रस्त्यावर गुडघाभर पाणी साचत असल्याची माहिती परिसरातील नागरिकांनी दिली. 

हेही वाचले पाहिजे-धक्कादायक : शांतीधाम पाण्याखाली गेल्याने रस्त्यावरच अंत्यविधी ​

महापालिकेने द्यावे लक्ष 

आरोग्याची काळजी घ्या, असे घशाला कोरड येईपर्यंत ओरडून सांगणाऱ्या महापालिकेच्या आरोग्य विभाग तसेच स्वच्छता विभागाकडून मात्र तुंबलेल्या गटाराच्या पाण्याला वाट करून देण्यासाठी कुठल्याही उपाययोजना केल्याचे दिसून येत नसल्याचे नागरिकांनी सांगितले. कोरोना चाचणी महत्वाची असल्यामुळे नागरिक त्यातूनच वाट काढून पुढे जात आहेत. त्यामुळे महापालिकेने तत्काळ लक्ष देण्याची मागणी नागरिकांनी केली आहे.