Nanded : रस्त्याने जाणाऱ्या-येणाऱ्यांना अडवून जबरी चोरी करण्याचे प्रकार अलिकडे वाढले आहेत. त्यासाठी पोलिस अधीक्षक श्रीकृष्ण कोकाटे यांनी यावर आळा घालण्यासाठी सर्व पोलिस ठाण्यांना सतर्क केले आहे. त्यानुषंगाने वजीराबाद पोलिसांनी २४ तासाच्या आत जबरी चोरी करणाऱ्या आरोपींना मुद्देमालासह अटक केली आहे.

अधिक माहिती अशी की, मोहम्मद फैज मोहम्मद सईद (रा. इतवारा) हे त्यांचा मित्र शेख अरबाज यांच्या सोबत देगलूर नाक्याकडे १३ जुलै रोजी जात हते. यावेळी दुचाकीवर आलेल्या दोन व्यक्तींनी त्यांना खंजरचा धाक दाखवून जबरी चोरी केली होती. त्याचा गुन्हा वजीराबाद पोलिस ठाण्यात दाखल करण्यात आला होता.

त्यावरून आरोपींचा शोध सुरु असताना खुनाच्या गुन्ह्यातून जामीनावर सुटलेला आरोपी जयमलसिंघ उर्फ गग्ग् हरबंससिंघ धालीवाल (वय २०, रा. अबचलनगर नांदेड) हा पंजाब राज्यातून आला असून, त्यांनीच साथीदाराच्या मदतीने हा गुन्हा केला असून तो पंजाबला पळून जाण्याच्या तयारीत असल्याची गोपनीय माहिती पोलिसांना मिळाली.

त्यावरून त्याचा शोध घेतला असता तो नगीनाघाट येथे असल्याची माहिती मिळताच पोलिसांनी त्याचा पाठलाग करून जयमलसिंघसह आकाशसिंघ साहेबसिंघ सुखमनी (वय २२, रा. बडपूरा नांदेड) यांना ताब्यात घेतले. त्यांच्याकडून दुचाकीसह जबरीने चोरी केलेले रोख दोन हजार रुपये जप्त केले आहे.

त्यांना सहायक पोलिस निरीक्षक दत्तात्रय मंठाळे यांनी न्यायालयात हजर केले असता, त्यांना १९ जुलैपर्यंत कोठडी मिळाली आहे. ही कारवाई सहायक पोलिस निरीक्षक शिवराज जमदडे, चंद्रकांत पवार, पोलिस उपनिरीक्षक दशरथ आडे, पोलिस अमलदार शरदचंद्र चावरे, विजयकुमार नंदे, मनोज परदेशी, रमेश सूर्यवंशी, शेख ईम्रान, साहेबराव कदम, राजु बोधगिरे यांनी केली आहे.