बिलोली : राज्यातील गोरगरीब, मराठवाड्याच्या हितासाठी आमच्या काळात सुरू झालेल्या महत्त्वाच्या योजना सध्याच्या सरकारने बंद केल्या. वैधानिक विकास मंडळ बंद करून मराठवाड्यावर अन्याय करण्यात आला. सत्तेसाठी लाचार होऊन मराठवाड्याची अस्मिता गहाण ठेऊ नका, असे प्रतिपादन विधानसभेतील विरोधी पक्ष नेते देवेंद्र फडणवीस यांनी सोमवारी (ता. २५) केले.

विधानसभेच्या देगलूर - बिलोली मतदारसंघाच्या पोटनिवडणुकीतील भाजप- मित्र पक्षाचे उमेदवार सुभाष साबणे यांच्या प्रचारार्थ सोमवारी (ता. २५) येते झालेल्या सभेत ते बोलत होते. केंद्रीय मंत्री रामदास आठवले, केंद्रीय राज्यमंत्री भागवत खुबा, माजी मंत्री बबनराव लोणीकर, खासदार प्रताप पाटील चिखलीकर, भाजपचे जिल्हाध्यक्ष व्यंकटराव पाटील गोजेगावकर, आमदार राम पाटील रातोळीकर, राजेश पवार, डॉ. तुषार राठोड, गोपीचंद पडळकर, गोविंद केंद्रे, डॉ. अजित गोपछडे, राजेश कुंटूरकर, लक्ष्मणराव ठक्करवाड आदी उपस्थित होते.

राज्यातील महाविकास आघाडीच्या सरकारने जलयुक्त शिवार, मराठवाडा सिंचन प्रकल्प, वैधानिक विकास मंडळ यासह गोरगरिबांच्या अनेक योजना बंद करून भ्रष्टाचार वाढविला. हे विकासाला प्राधान्य देणारे सरकार नव्हे तर चालू लोकांचे चालू सरकार आहे. ओबीसी समाजाचे राजकीय आरक्षण या सरकारने घालवले. मन्नेरवारलू, कोळी समाजासह कुठल्याही समाजाला न्याय न देणारे हे निष्क्रिय सरकार आहे. एवढा अनागोंदी कारभार चाललेला असताना मराठवाड्याची अस्मिता गहाण ठेवण्याचे प्रकारही सत्तेसाठी लाचार असलेल्या मंडळींकडून होताना दिसत आहे. पोटनिवडणुकीच्या माध्यमातून या सरकारला झटका देण्याची सुवर्णसंधी मतदारांच्या हाती आहे. या संधीचे सोने करण्याचे आवाहन फडणवीस यांनी केले.

आठवले, खुबा, खासदार चिखलीकर, जिल्हाध्यक्ष गोजेगावकर, उमेदवार साबणेंनी मनोगत व्यक्त केले.

राज्यातील महाविकास आघाडीचे सरकार भ्रष्टाचार करून सर्वसामान्यांची लूट करत आहे. मात्र, केंद्र सरकार गोरगरिबांच्या कल्याणासाठीच्या योजना प्रभावीपणे राबवीत आहे. पंतप्रधान नरेंद्र मोदी हे सर्व क्षेत्रातील दलाली बंद करून गोरगरिबांना बळकट करण्याचे काम करीत आहेत. त्यामुळे केंद्र शासनाच्या सर्व योजना राज्यात प्रभावीपणे राबवण्यासाठी भाजप विशेष प्रयत्न करत आहे.

- देवेंद्र फडणवीस, विरोधी पक्ष नेते