नांदेड : जिल्हाधिकारी डॉ. विपीन इटनकर (Dr. Vipin, IAS, Collector, Nanded) यांनी शुक्रवारी (ता. सात) नैसर्गिक विषमुक्त शेतीसाठी (Natural toxin free) पाहणी दौरा केला. शहरास लागून असलेल्या विश्वनाथ होळगे यांच्या नैसर्गिक शेतात(Natural farm) पिकविल्या जाणाऱ्या विषमुक्त भाजीपाला, विविध फळे, गाजर, मुळा, पातीचे कांदे यांची पहाणी केली.

यावेळी त्यांच्या सोबत तहसीलदार व्यंकटेश मुंडे, जिल्हा कृषी अधीक्षक रवीशंकर चलवदे, तालुका कृषी अधिकारी श्री. घुमनवाड, गटविकास अधिकारी श्री. वावळे, ग्रामविकास अधिकारी श्री. नावंदे यांच्यासह जिल्हा परिषदेचे सदस्य प्रवीण पाटील चिखलीकर, लोहा पंचायत समितीचे सभापती आनंदा शिंदे, शंकर ढगे तसेच गावकरी उपस्थित होते.

होळगे यांनी स्वागत केले आणि त्यांना नैसर्गिक पद्धतीने पिकविलेल्या भाजीपाल्याची टोपली भेट दिली. दरम्यान, जिल्हाधिकारी हे जवळपास दोन तास शेतात रमले. सर्व पिकांची पाहणी केली. शेतकऱ्यांसोबत चर्चा करत त्यांनी शेतातील गाजर आणि टोमॅटोचा आस्वाद घेतला. त्यांनी शेतकरी श्री होळगे यांच्याकडुन शेती करण्याचे तंत्र आणि वापरले जाणारे नैसर्गिक कंपोष्टखते याबद्दल विचारणा केली. नैसर्गिक पद्धतीने पिकविलेली शेती पाहून शेतकऱ्यांना विषमुक्त भाजीपाला,फळे पिकवण्यासाठी प्रोत्साहित केले.