नांदेड - नांदेड येथील सचखंड गुरूद्वारा बोर्डाच्या संदर्भातील गुरूद्वारा बोर्ड ऍक्ट 1956 चा कायदा जैसे थेच ठेवावा. त्यामध्ये बदल करू नये. तसेच कलम 11 मधील दुरूस्ती रद्द करावी, अशी मागणी गुरूद्वारा बोर्डाचे विद्यमान सचिव रविंद्रसिंघ बुंगई, माजी सचिव रणजितसिंघ कामठेकर आणि माजी न्यायाधीश परमज्योतसिंघ चाहेल यांनी मुख्यमंत्री उद्धव ठाकरे यांची भेट घेऊन केली आहे.

या संदर्भात उपरोक्त तिघांनी मुख्यमंत्री ठाकरे यांची 6 डिसेंबर रोजी मुंबई येथे मातोश्री निवासस्थानी भेट घेतली. याचवेळी पंजाबातील अकाली दलाचे नेते खा. प्रेमसिंघ मांजरा हे दलाचे अध्यक्ष प्रकाशसिंघ बादल यांचा शेतकरी आंदोलनाच्या संदर्भातील संदेश घेऊन मुख्यमंत्र्यांच्या भेटीसाठी आले होते. दिल्लीच्या सिमेवर गेल्या बारा दिवसांपासून शेतकऱ्यांचे आंदोलन चालू आहे.

हेही वाचा -  नांदेड : तीन दुचाकी चोरांना अटक, दागिणे व दुचाकीसह सात लाखाचा मुद्देमाल जप्त- शिवाजीनगर पोलिसांची कामगिरी -

आंदोलनकारी शेतकऱ्यांच्या मागण्यांबाबत देशातील सर्व प्रादेशिक पक्षांचे नेते पुढील आठवड्यात राष्ट्रपती रामनाथ कोविंद यांची भेट घेणार आहेत. या भेटीसाठी मुख्यमंत्री उद्धव ठाकरे यांनीदेखील दिल्लीला यावे, असा बादल यांचा संदेश खा. मांजरा यांनी दिला. त्याचवेळी नांदेडच्या शिष्टमंडळाचीही मुख्यमंत्र्यांशी भेट झाली.

यावेळी बोर्डाचे सचिव रविंद्रसिंघ बुंगई, माजी सचिव रणजितसिंघ कामठेकर आणि न्या. परमज्योतसिंघ चाहेल यांनी गुरूद्वारा बोर्डाचा सन 1956 चा कायदा जैसे थे ठेवावा, त्यामध्ये काही बदल करू नये. तसेच कलम 11 मधील दुरूस्ती रद्द करावी. भाटीया आयोग लागू करू नये, अशी मागणी मुख्यमंत्र्यांकडे केली. तसेच यावेळी कामठेकर यांनी शेतकऱ्यांच्या सध्याच्या आंदोलनाला पाठिंबा देण्याचे सरपंच संघटनेचे निवेदनही मुख्यमंत्र्यांना दिले. मुख्यमंत्री ठाकरे यांच्यासोबत सुमारे पाऊण तास झालेली भेट व चर्चा सकारात्मक होती, असे कामठेकर यांनी सांगितले.