नांदेड - वाहन चालविताना मोबाइलवर बोलणे, ट्रिपल सिट वाहन चालविणे, सिग्नल तोडून भरधाव जाणे, वाहतूक नियमांचे नेहमीच होणारे अशा प्रकारचे उल्लंघन वाहनचालक आणि पादचाऱ्यांच्या जीवावर बेतते.

या बेताल वाहतुकीने नागरिक बेजार झाले असून, याला आळा घालणार कोण?, असा प्रश्न उपस्थित होत आहे. याबाबत पोलिस, महापालिका आणि प्रादेशिक परिवहन कार्यालय यांनी समन्वय ठेऊन कार्यवाही करण्याची गरज व्यक्त होत आहे.

भर चौकात उभे राहणारे अॅटो, वाढते अतिक्रमण तसेच फेरीवाल्यांमुळेही वाहतुकीची कोंडी होत आहे. नांदेड शहरात बेताल वाहतुकीने विळखा घातला आहे. वाहतूक सुरळीत व्हावी, यासाठी प्रशासकीय यंत्रणा आणि वाहतूक नियमांचे उल्लंघन करणाऱ्या वाहनचालकांमध्येही इच्छाशक्ती हवी. अपघातांमध्ये अनेकांचा बळी जातो. अपंगत्वसुद्धा येते. या बेताल वाहतुकीने शहरात अनेक बळी गेले आहेत. त्यानंतरही शहरातील वाहतुकीला शिस्त लावण्यासाठी ठोस उपाययोजना केली जात नाही, हे नांदेडकरांचे दुर्दैव आहे.

मोबाइलमध्ये दंग पोलिसदादा शहरातील सर्वच प्रमुख चौकांमध्ये वाहतुक नियंत्रणासाठी पोलिस तैनात केले जातात. वाहतूक नियंत्रण शाखेचे कर्मचारी व अधिकारी वाहतूक नियंत्रणासाठी फिरत असतात. मात्र, चौकाचौकातील वाहतूक नियंत्रणासाठी नियुक्त पोलिसदादा मोबाईलमध्ये दंग राहत असल्याने वाहतूक नियंत्रणाचा बोजवारा उडत आहे.

जड वाहनांची बंदी नावालाच

शहरात नियमबाह्यपणे प्रवेश करणाऱ्या जड वाहनांमुळे अपघातांचे प्रमाण वाढत आहे. ट्रक कुठेही उभे करण्यात येत असल्याने वाहतुकीस अडथळा निर्माण होतो. जड वाहने उभी केल्याने हाणामारीच्या घटनाही घडतात. नमस्कार चौक, तरोडा नाका, छत्रपती चौक आदी परिसरात ट्रक मोठ्या प्रमाणात उभे असतात.

नियमांचे करा पालन

वाहन चालविताना सिग्नल तोडून पुढे जाऊ नका

चौकात रेड सिग्नल असताना झेब्रा क्रॉसिंगच्या मागे वाहन थांबवा

सिग्नलवर वाहन उभे करताना आपल्या डाव्या बाजूकडील जागा मोकळी ठेवा

दुचाकीवर हेल्मेट वापरा, वाहनाची कागदपत्रे सोबत बाळगा

दुचाकी चालविताना ट्रिपल सिट चालवू नका

वाहनांच्या गतीवर नियंत्रण ठेवे

मद्यपान करून वाहन चालवू नका

नागरिकांनीही बनावे जबाबदार

वाहतुकीच्या नियमांचे पालन करण्याची जबाबदारी केवळ आरटीओ किंवा वाहतूक पोलिसांची नाही, तर वाहन चालकांनीही वाहतूक नियमांचे पालन करण्याची जाणीव ठेवली पाहिजे. निव्वळ प्रशासकीय यंत्रणेला दोष देऊन चालणार नाही. जबाबदारी नागरिक म्हणून आपण वागण्याचा प्रयत्न करतो का? बेताल वाहतुकीला नावे ठेवताना आपणही त्याच बेताल वाहतुकीसाठी जबाबदार असणाऱ्यांपैकी एक आहोत, हे विसरून चालणार नाही. त्यामुळे वाहतूक नियमांचे पालन करणे प्रत्येक वाहन चालकाची जबाबदारी नाही तर कर्तव्य आहे.